मसलालाई तातो तेलमा भुट्ने, डढाउने, झान्ने, पड्काउनाले त्यसमा भएको अधिकांश तत्व नष्ट मात्र हुँदैन, अपाच्य र गरिष्ठ समेत बन्दछ ।
किसिमकिसिमका मसलाहरु एकैचोटि मिसाएर प्रयोग गर्दा औषधीय गुणको प्रभाव कम हुन गई लाभको सट्टा हानि बढी हुन्छ ।
प्रचलित खानेकुराहरु, जस्तै : दाल, तरकारी, अचार, मासु या पक्वान्न कुन प्रकृति वा स्रोतको खानेकुरा हो, सोही प्रकृतिसँग मिल्ने मरमसलाको प्रयोग गर्न नजाने मसला र मसला प्रयुक्त खाद्य सामग्री दुवै घातक पनि हुन सक्छन् ।
कुन चिजका लागि कुन मसला कति मात्रा हुनुपर्ने हो यसबारे उपयुक्त ज्ञान नहुँदा पनि त्यसको प्रभाव उल्टो पर्न सक्छ ।
कुन खाद्यवस्तु पकाउँदा कुन समयमा कतिखेर मसला हाल्ने भने भन्ने नजान्दा पनि त्यसको फाइदा घट्न जान्छ ।
ऋतु, समय, मौसम, ठाउँ, उमेर र शरीरगत रोगावस्था हेरी उचित रीतिले मसलाको प्रयोग गरेमा अवश्यमेव लाभदायक हुन्छ । त्यसो नगर्दा मसलाकै कारण रोगमाथि रोग र मलमाथि मल थपिँदै जाने खतरा बढ्दछ ।
दिनैपिच्छे र त्यसमा पनि परिकारैपिच्छे प्रयोगमा ल्याइन हुनाले नजिकको तीर्थ हेला भनेझैँ मरमसलाको महत्व पनि ओझेलमा परेको हुन सक्छ, साथै यसका चामत्कारिक गुणहरु थाहा नहुन सक्छन् ।
साभारः ‘खाने कसरी पिउने कसरी’ पुस्तकबाट
