‘थोरै खाए बल, धेरै खाए मल’ भन्ने पुरानो लोकोक्ति निकै गहकिलो प्रतीत हुन्छ । किनकि वैज्ञानिक अध्ययनहरुले पनि थोरै मात्रामा भोजन गर्ने व्यक्तिको शरीरक्रिया तथा मोलेक्युलर बायोलोजिकल अवस्थितिमा उल्लेख्य सुधार आउने तथ्य प्रमाणित गरेका छन् । थोरै खाने व्यक्तिमा रोगविरुद्ध लड्ने क्षमता धेरै खानेको तुलनामा बढी हुने कुरा पनि अध्ययनहरुले पुष्टि गरेका छन् ।
गलगिद्ध हुने गरी अधिक मात्रामा भोजन गर्नुभन्दा एन्टिअक्सिडेन्टयुक्त र कम क्यालोरियुक्त तर सन्तुलित भोजन ग्रहण गर्नाले त्यसबाट टेलोमेरेज नामक विशेष प्रकारको प्रोटिन इन्जाइम सक्रिय हुन थाल्दछ । उक्त इन्जाइमको व्यवस्थित क्रियाकलापले व्यक्तिको आयु बढाउन सहयोग पु¥याउँछ । शरीर बूढो हुँदै जाने क्रममा टेलोमेयर्सको आकार सानो हुँदै जान्छ जब कि टेलोमेरेज इन्जाइमद्वारा टेलोमेयर्स क्यापलाइ पुनः निर्माण गर्न सकिन्छ । श्वेत रक्तकोशिका मा टेलोमेयर्सको आकार सानो हुँदै जानुको फलस्वरुप विभिन्न किसिमका सङ्क्रमण एवम् रोगहरु उत्पन्न हुन थाल्दछन् । यो प्रयोगलाई नजिकबाट हेर्नका लागि एकपटक वैज्ञानिकहरुले मुसामाथि अध्ययन गरेका थिए । अध्ययनले के देखायो भने टेलोमेरेजको मात्रा बढेको खण्डमा क्यान्सर हुने खतरा पनि बढेर जान्छ । यद्यपि यसको मात्रा बढ्नाले बुढेसकालमा पनि मांसपेशीहरु बलिया भएको पाइयो भने छाला र पेट पनि स्वस्थ थिए ।
साभारः ‘खाने कसरी पिउने कसरी’ पुस्तकबाट
