पोखरा, १६ मंसिर । पोखरामा नेवार कन्याहरुको सामुहिक बेल विवाह गरिएको छ । नेवा देय दबु कास्की र नेवा देय दबु पोखरा महानगर समितिको संयुक्त आयोजनामा पोखरामा सामुहिक बेल विवाह गरिएको हो । नेवारी परम्परा अनुसार भइरहेको सामुहिक बेलविवाह शुक्रबार शुरु भएको छ भने यो शनिबारसम्म चल्नेछ । नेवारी संस्कृति र परम्पराको संरक्षण गर्ने उद्देश्यले आयोजित सामुहिक बेल विवाहमा ३५ नेवार कन्याहरु सहभागी भएको नेवा देय दबु कास्कीका संयोजक कृष्णमान ठूसाजुले जानकारी दिए । उनका अनुसार तनहुँ दुलेगौंडाका नेवार पुरोहित लालप्रसाद प्रधानले बेल विवाह गराईरहेका छन् ।
पुरोहित प्रधानले नेवारी परम्परा अनुसार बेल विवाह गराईरहेको बताए । शनिबार रुद्री पूजा सकेर कन्यादान गरेपछि बेल विवाह सम्पन्न हुने उनले बताए । उनका अनुसार आइतबार भने कन्याहरुको आ–आफ्नो घरमा चतुर्थी पूजा गर्नुपर्छ । बेल विवाहको शुभारम्भमा नेवा देय दबुका गण्डकी प्रदेशका बरिष्ठ उपाध्यक्ष विष्णुशंकर ख्वाउजु, नेवा देय दबु कास्कीकी सचिव रिता नापित, महानगर समितिका अध्यक्ष तीर्थ श्रेष्ठ लगायतले बेल विवाहको महत्वबारे प्रकाश पारेका थिए ।
कार्यक्रममा बोल्दै नेवा देय दबुका कास्की अध्यक्ष कृष्णमान ठूसाजुले सबैले बेल विवाह गर्ने वातावरण निर्माण गर्ने प्रयास आफूहरुले गरेको बताए । ‘बेल विवाह गर्ने संस्कृति र परम्परा जोगाउनुपर्छ । धनी र गरीव सबैले समान तरिकाले बेल विवाह गरुन् भन्ने उद्देश्य राखेर हामीले आयोजना गरेका हौं’–उनले भने । नेवा देय दबुले पोखरामा सामुहिक बेलविवाह आयोजना गरेको यो दोश्रो पटक हो । यसअघि गरिएको सामुहिक बले विवाहमा २१ जना नेवार कन्याहरु सहभागी थिए ।
