काठमाडौं । राष्ट्रिय सभा निर्वाचनमा दलहरू गठबन्धन गरेर गएपछि औपचारिकताका लागि मात्र माघ ११ गते कुर्नुपर्ने भएको छ । दलहरूले भागबन्डा गरेर उम्मेदवार सेलेक्सन गरिसकेकाले अब इलेक्सन औपचारिकतामै सीमित भएको हो ।
निर्वाचनका लागि सत्ता गठबन्धनबीच भागबन्डाअनुसार उम्मेदवारी दर्ता भएको छ । एमाले एक्लै मैदानमा उत्रँदै छ । निर्वाचनको अंकगणितलाई हेर्दा यसपटक एमालेले आफ्नो खाली हुने आठवटै सिट गुमाउने देखिएको छ ।
आगामी फागुन २० गते राष्ट्रिय सभामा एमालेका आठ, नेपाली कांग्रेसका चार, माओवादीका तीन, एकीकृत समाजवादीका दुई तथा जनता समाजवादी पार्टी र स्वतन्त्रका एक–एक गरी १९ सिट रिक्त हुँदै छन् ।
निर्वाचनमा ५४९ प्रदेश सभा सदस्य तथा स्थानीय तहका १४ सय ९८ प्रतिनिधि गरी दुई हजार ४७ जनाले मतदान गर्नेछन् । स्थानीय तहअन्तर्गत नगरपालिकाका प्रमुख तथा उपप्रमुख र गाउँपालिकाका अध्यक्ष तथा उपाध्यक्ष मतदाता हुन्छन् ।
निर्वाचन आयोगले प्रदेशसभाका एक सदस्य बराबर ५३ र स्थानीय तहका एक प्रतिनिधि बराबर १९ मतभार कायम गरेको छ । यस हिसाबले प्रदेशसभा सदस्यको २९ हजार ९७ र स्थानीय तहका प्रतिनिधिको २८ हजार चार सय ६२ गरी ५७ हजार पाँच सय ५९ कुल मतभार कायम भएको छ ।
कांग्रेस, माओवादी, एकीकृत समाजवादी, जनता समाजवादी पार्टी, लोसपा, जनमोर्चा, जनमत र नागरिक उन्मुक्ति पार्टीसहितको मतभार ३८ हजार २१० छ । एमालेको १७ हजार २६ छ । प्रदेशगत रूपमा पनि मतभारका हिसाबले एमाले सबैतिर कमजोर छ ।
कोशी प्रदेशसभामा ठूलो दल रहेको एमाले मतभारमा भने गठबन्धनभन्दा पछाडि छ । यहाँ गठबन्धनको ५४ सय ७४ मतभार रहँदा एमालेको ४२ सय १० छ ।
मधेशमा गठबन्धनको ७ हजार ९८० तथा एमालेको २३ सय ३ मतभार छ । बागमतीमा गठबन्धनको ६ हजार ७५१ तथा एमालेको २५ सय ७१ र गण्डकीमा गठबन्धनको ४६ सय २२ तथा एमालेको २४ सय ५८ मतभार छ ।
लुम्बिनीमा गठबन्धनको ५३ सय ७१ रहँदा एमालेको २८ सय १०, कर्णालीमा गठबन्धनको ३७ सय ७ तथा एमालेको ११ सय ९५ र सुदूरपश्चिममा सत्ता गठबन्धनको ४५ सय १० तथा एमालेको १४ सय ८० मतभार छ । यसले गर्दा चुनाव औपचारिकतामा मात्र सीमित हुने भएको छ ।
