काठमाडौँ–आइतबारदेखि सुरु हुने फिफा विश्वकपको उद्घाटनका लागि कतारले सबै तयारी पूरा गरिसकेको छ । विश्वकपका लागि सहभागी टोलीहरु कतार पुग्नेक्रम जारी छ । एशियाली क्षेत्रमा दोस्रो पटक फुटबलको महाकुम्भ हुन लागेको हो । यसअघि दक्षिण कोरिया र जापानले विश्वकप आयोजना गरिसकेका छन् ।
आइतबार राति पौने ८ बजे विश्वकपको औपचारिक उद्घाटन हुनेछ । विश्वकपको उद्घाटन खेलमा आयोजक कतारले अल बायत स्टेडियममा इक्वेडरको सामना गर्नेछ । खेलअघि भव्य समारोहका बीच कतार विश्वकप २०२२ को औपचारिक उद्घाटन गर्ने तयारी गरिएको छ । उद्घाटन समारोहमा विश्वकपका असामान्य क्षणहरु देखाइनेछ । ती क्षणमा रोनाल्डो र म्यारोडोनाले खेलेका खेलहरुको दृश्य देखाइनेछ ।
यो पटकको विश्वकपको उद्घाटनमा पेले, म्याराडोनलाई देख्न पाइनेछैन । पेलेले १९५८ मा पहिलो पटक विश्वकपको उपाधि उचालेका थिए । स्वास्थ्यमा समस्या आएका कारण उनी यो पटक कतार पुग्ने छैनन् । उनको भिडियो सन्देश भने देखाइनेछ ।
म्याराडोनाको सन् २०२० मा निधन भएको थियो । त्यसैले उनलाई यो पटकको विश्वकपमा देख्न पाइने छैन । उनले सन् १९८६ मा हातले गरेको गोल हरेक विश्वकपमा चर्चामा आउने गर्छ । विश्वकपको उद्घाटनमा कोरियाली ब्यान्ड बीटीएस, बलिउड स्टार नोरा फतेह कोलम्बियाली गायिका शकिरा, जे बाल्भिन, नाइजेरियन गायक तथा गीतकार प्याट्रिक ओकारी, नाइजेरियाली कलाकार किज डेनियलसँगै स्थानीय कलाकारले प्रस्तुति दिनेछन् ।
उनीहरुसँगै अमेरिकन गायक लिल बेबीले पनि आफ्नो प्रस्तुति दिनेछन् । बेबीले विश्वकप २०२२ को एन्थम गीत द वल्र्ड इज योर्स टु टेक गाएका थिए । जुन यो अफिसियल गीतमा मनाल र रहमासँगै फतेही पनि देखिएका छन् ।
यसअघि जुन–जुलाइमा विश्वकव आयोजना हुँदै आएपनि कतारको मौसमलाई मध्यनजर गर्दै पहिलो पटक नोभेम्बर डिसेम्बरमा विश्वकप आयोजना गर्न लागिएको हो ।
