भनिन्छ, नेता ताली र गाली दुवै खान तयार हुनुपर्छ । तर, नेपालका नेताहरुले भने बेलाबेलामा गाली मात्रै होइन, मुक्का, झापडदेखि जुत्ता प्रहारसम्मको सामना गर्नुपरेको छ । समृद्धिका लागि संकल्प यात्रा भन्दै नेकपा एमालेले थालेको मध्यपहाडी अभियानको क्रममा देश दौडाहामा रहेका एमाले अध्यक्ष तथा पूर्वप्रधानमन्त्री केपी शर्मा ओलीमाथि बिहीबार धनकुटामा मुक्का प्रहार भयो ।
मेची–महाकाली पदयात्राका क्रममा धनकुटा पुगेका बेला ओलीमाथि लेगुवाका महेश राईले मुक्का हानेका थिए । ओलीले मुक्का खाएको विषय सामाजिक सञ्जालमा भाइरल बनेपछि यसअघिपनि शीर्ष नेताहरुले खुकुरीदेखि जुत्ताको प्रहार खाएका घटना पुनः चर्चामा आएका छन् । केहि महिना अघि मात्रै कांग्रेस सहमहामन्त्री महेन्द्र यादवमाथि भृकुटीमण्डपमा खुकुरी प्रहार भएको थियो । अहिलेका राष्ट्रपति रामचन्द्र पौडेललाई पनि २०५१ सालमा संसदमा तत्कालीन एमालेका तर्फबाट राष्ट्रिय सभामा सदस्य रहेका गोल्छे सार्कीले जुत्ता प्रहार गरेका थिए ।
हालका प्रधानमन्त्री पुष्पकमल दाहालले पनि २०६९ मंसिरमा आफ्नै नेतृत्वमा भएको सशस्त्रयुद्धमा सहभागी एक लडाकुको परिवारका सदस्यबाट झापड खानु पर्याे । प्रचण्ड माथि दोस्रो पटक २०७२ साउन २ गते सिराहामा ढुंगा र बोतल प्रहार भएको थियो । त्यस अघि २०७० कात्तिक २७ दाहाललाई नै लक्षित गरी कञ्चनपुरको ढक्कापुरमा शक्तिशाली विस्फोट गराइएको थियो । यस्तै २०७६ फागुन १८ गते भरतमोहन अधिकारीको प्रथम स्मृतिसभालाई सम्बोधन गर्दा समेत दाहाल माथि राष्ट्रियसभा गृहमा जुत्ता प्रहार भएको थियो ।
पूर्वप्रधानमन्त्री तथा नेकपा एकीकृत समाजवादीका वरिष्ठ नेता झलनाथ खनाललाई २०६७ माघमा सुनसरीमा आयोजित पार्टी प्रवेश कार्यक्रममा स्थानीय देवीप्रसाद रेग्मीको झापड हानेका थिए । खनाललाई थप्पड हानेको घटना सेलाउन नपाउँदै एमालेकै नेता खगराज अधिकारीलाई एमाले कार्यकर्ताले नै दुई चड्कन लगाएका थिए । यस्तै २०७३ मंसिर २२ गते पूर्वप्रधानमन्त्री डा.बाबुराम भट्टराईलाई पनि पोखरामा जुत्ता प्रहार गरिएको थियो । माओवादी नेता झक्कुप्रसाद सुवेदीलाई पनि २०६९ जेठ २ गते संविधानसभाको बैठक सकेर घर फर्कंदै गर्दा तीनकुनेस्थित एक चिया पसलले झापड हानेका थिए ।
पूर्वप्रधानमन्त्री एवं कांग्रेसका पूर्वसभापति स्वर्गीय सुशील कोइरालालाई पनि २०६९ असोज १३ गते काठमाडौंको कपनमा उनकै कार्यकर्ता प्रवेश बस्नेतले आक्रमण गरेका थिए । हालका उपप्रधान एवम् रक्षामन्त्री पूर्णबहादुर खड्कालाई पनि २०६५ जेठ १५ गते एमालेकी सभासद् कमला शर्माले चप्पल प्रहार गरेकि थिइन् । यस्तै पूर्वअर्थमन्त्री डा. रामशरण महतमाथि पनि २०७४ चैत १ एक कार्यक्रममा पानीको बोटल प्रहार भएको थियो । थप्पड संस्कृति शिर्ष नेतामा मात्र सिमित छैन । नेपाली कांग्रेस पर्साका सभापति एवं क्षेत्र नम्बर ४ का सभासद सुरेन्द्रप्रसाद चौधरीले कांग्रेस नेता अजय चौरसियालाई कुटेका थिए ।
तत्कालिन मधेश प्रदेशका राज्यमन्त्री योगेन्द्र यादवलाई नेपाली कांग्रेसकी प्रदेशसभा सदस्य प्रमिलादेवी दासले झापड हानेकी थिइन् । यी केही उदाहरण मात्रै हुन् । पछिल्लो समय शिर्ष नेतादेखि प्रदेश सांसद र स्थानीय तहका जनप्रतिनिधि समेतले बेलाबेलामा झापड, मुक्का र जुत्ताको प्रहार भोग्नु परेको छ । यी घटनाले नेपाली नेताहरु प्रतिको कार्यकर्ता र जनताको आक्रोश बढ्दै गएको संकेत गरेको छ । अन्तर्राष्ट्रिय रुपमा पनि ठूलो नेताहरुलाई झापड हान्नेदेखि जुत्ता प्रहार हुने गरेका घटनाहरु थुप्रै छन् ।
