ढाका— बंगलादेशकी प्रधानमन्त्री शेख हसिनाले बंगलादेशका हिन्दू समुदायले आफूलाई अल्पसंख्यक समुदायको सदस्यको रूपमा मान्न नहुने बताएको ढाका ट्रिब्यूनले उल्लेख गरेको छ।
उनले उनीहरुलाई बंगलादेशमा समान अधिकारको उपभोग गर्न र आफ्नो जीवन बाँच्न आग्रह ग।िन् ‘तपाईहरु किन आफूलाई अल्पसंख्यक भन्नुहुन्छ यहाँ अल्पसंख्यक र बहुसंख्यक केही छैन ।’––उनले भनिन्
‘बरु यहाँ सबै नागरिक समान अधिकारको उपभोग गरी बस्नेछन् । आफूलाई अल्पसंख्यकको रूपमा कमजोर नगर्नुहोस्।’– उनले भनिन् ।
ढाका ट्रिब्यून अनुसार आफ्नो आधिकारिक निवास गणभवन परिसरमा हिन्दू समुदायसँग जन्माष्टमीको अवसरमा शुभकामना आदानप्रदान गर्दा शेख हसिनाले यस्तो बताएकी हुन् ।
हिन्दू समुदायको बारेमा टिप्पणी गर्दै उनले यो माटोमा जन्मिएकाहरु यही माटोका सन्तान भएको भन्दै यो माटोको नागरिकका रुपमा उनीहरुको अधिकार रहेको बताइन् ।
उनले सरकारले सधैं बंगलादेशमा धार्मिक र साम्प्रदायिक सद्भाव कायम राख्ने प्रयास गर्छ र सामाजिक ऐक्यबद्धता राख्छ जहाँ एकले अर्कोलाई कमजोर बनाउँदैन र सबै जनताले समान अधिकारको उपभोग प्रत्याभूति गर्ने बताइन् ।
बंगलादेशका प्रधानमन्त्रीले विदेशमा गएर बंगलादेशलाई बदनाम गर्ने केही व्यक्ति यही देशमा रहेको उल्लेख गरिन् । ‘यस विषयमा सबैलाई सचेत रहन अनुरोध गर्न चाहन्छु,’ उनले थपिन् ।
