भोजन हाम्रो दैनिक जीवनको अभिन्न अङ्ग हो । प्रत्येक व्यक्तिअनुसार भोजनको प्रकृति फरकफरक हुन्छ । कोही मांसाहारी हुन्छन् भने कोही शाकाहारी । भोजनद्वारा नै शरीरले पोषणतत्व प्राप्त गर्छ । भोजनले शरीरबाट रोगहरू भगाउने अपेक्षा गरिन्छ । यस्ता गुण शाकाहारी भोजनमा पाइन्छन् । शाकाहारी भोजनले मानिसलाई ऊर्जावान् र निरोगी बनाउँछ ।
– मांसाहार पचाउन लामो समय लाग्छ जसका कारण पाचन मन्द हुन्छ तर शाकाहारी भोजन हलुका र पचाउन सजिलो हुने हुँदा धेरै ऊर्जा खर्च हुँदैन । शाकाहारबाट पाचनको गति बढ्छ र पाचनतन्त्र बलियो पनि हुन्छ । शरीरमा स्फुर्ति आउँछ । यस प्रकरको भोजनले दिमाग सक्रिय पनि बनाउँछ ।
– शरीरका लागि आवश्यक प्रोटिन, कार्बोहाइड्रेट्स र फ्याट जस्ता तत्वहरु शाकाहारबाटै प्राप्त हुन्छ । मिनरल, क्यालोरी, फाइबर र भिटामिन जस्ता तत्वहरु फल र तरकारीबाट प्रचुर मात्रामा पाइन्छ ।
– फल, तरकारी र अनाजमा रेसा र एन्टीअक्सिडेन्ट गुणहरू प्रचुर मात्रामा पाइन्छ जसका कारण क्यान्सर लाग्ने सम्भावना पनि कम हुन्छ ।
– शाकाहारी भोजनले शरीरको प्रतिरक्षात्मक प्रणालीलाई बलियो बनाउँछ । छिटो बिरामी पर्ने अनि गम्भीर रोग लाग्ने सम्भावना रहँदैन ।
– शाकाहारी भोजनमा भएका औषधीय गुणहरूले गर्दा शरीरको विषालु पदार्थलाई बाहिर निकाल्न सहयोग गर्छ ।
– शाकाहारी भोजन गर्ने मानिसलाई मोटोपन कमै हुन्छ । यस्ता मानिसले कार्बोहाइड्रेट्स धेरै खाने भएकाले उच्च रक्तचापको समस्याले सताउन पाउँदैन ।
– शाकाहारी भोजनमा बोसो र कोलेस्ट्रोल कम हुने भएकाले शाकाहारीहरूलाई हृदयरोगको सम्भावना कम हुन्छ ।
