नयाँ दिल्ली– आपराधिक गतिविधिबाट सृजित सम्पत्तिलाई निरुत्साहित गर्न समयमै सम्पत्ति ट्रेसिङ गर्नु पर्ने भारतीय प्रधानमन्त्री नरेन्द्र मोदीले जोड दिए।
कोलकातामा भएको जी–२० अन्र्तगत भ्रष्टाचार विरोधी कार्य समूहको तेस्रो र अन्तिम मन्त्रीस्तरीय बैठकलाई भिडियो कन्फरेन्समार्फत सम्बोधन गर्दै प्रधानमन्त्री मोदीले २०१४ मा भएको आफ्नो पहिलो जी–२० शिखर सम्मेलनको स्मरण गरे।
उक्त शिखर सम्मेलनमा सबै जी–२० आवद्ध देशहरू र ग्लोबल साउथका लागि फरार आर्थिक अपराधीहरूको चुनौतीहरूको बारेमा बोल्दै, भारतीय प्रधानमन्त्रीले फरार आर्थिक अपराधीहरू विरुद्ध कारबाही र सम्पत्ति पुनः प्राप्तिको लागि नौ बुँदे एजेन्डा प्रस्तुत गरेको उल्लेख गरे ।
भारतीय प्रधानमन्त्री मोदीले सूचना आदानप्रदान मार्फत कानून कार्यान्वयनमा सहयोग, सम्पत्ति असुली संयन्त्रको सुदृढीकरण र भ्रष्टाचार विरोधी निकायको निष्ठा र प्रभावकारिता अभिवृद्धि गरी तीनवटा प्राथमिकताका क्षेत्रमा कार्यमुखी उच्चस्तरीय सिद्धान्तको स्वागत गरे ।
यसैबीच, भारतीय प्रधानमन्त्रीले भ्रष्टाचारविरुद्धको लडाइमा जी–२० राष्ट्रहरूको सामूहिक प्रयासले महत्वपूर्ण सहयोग पुग्ने र बढ्दो अन्तर्राष्ट्रिय सहयोग र भ्रष्टाचारको मूल कारणलाई सम्बोधन गर्ने बलियो उपायहरूको कार्यान्वयनबाट ठूलो भिन्नता ल्याउन सकिने बताए।
उनले भ्रष्टाचार विरुद्धको लडाईमा लेखापरीक्षण संस्थाको भूमिका र प्रशासनिक र कानुनी प्रणालीलाई सुदृढ गर्दै मूल्य प्रणालीमा नैतिकता र इमान्दारीताको संस्कृतिलाई बढावा दिनका लागि पनि प्रकाश पारे।
