काठमाडौं । नेपाली कांग्रेसका सभापति शेरबहादुर देउवाले पाँच दलीय गठबन्धन लामो समयसम्म कायम रहने बताएका छन् । पाँच दलीय गठबन्धनको बाग्मती प्रदेशस्तरीय कार्यकर्ता भेलालाई काठमाडौंमा सम्बोधन गर्दै देउवाले लहडले गठबन्धन नबनेको भन्दै सबै दलका नेता र कार्यकर्ताहरूलाई एकताबद्ध भएर अगाडि बढ्न आग्रह गरे ।
पूर्वप्रधानमन्त्री तथा नेपाल समाजवादी पार्टीका अध्यक्ष डाक्टर एमालेले बनाएको चुनावी गठबन्धनलाई अपवित्र भएको आरोप लगाएका छन् । पाँच दलीय गठबन्धनले बागमती प्रदेशमा गरेको प्रदेश स्तरीय कार्यकर्ता भेलामा भट्टराईले सत्तारुढ गठबन्धन भने अहिलेको आवयकता रहेको दाबी गरे ।
नेकपा एकीकृत समाजवादीका अध्यक्ष माधवकुमार नेपालले नेकपा ९एमाले०का अध्यक्ष केपी ओली पतन भएर जाने दाबी गरेका छन् । सत्ता गठबन्धनले काठमाडौंमा गरेको बाग्मती प्रदशस्तरीय कार्यकर्ता भेलामा अध्यक्ष नेपालले संविधानलाई धुजाधुजा पार्ने, गणतन्त्रलाई नै समाप्त पार्ने ओली प्रवृत्तिलाई समाप्त पार्न अहिलेको गठबन्धन बनेको भन्दै ओली पतन भएर जाने दाबी गरेका हुन् ।
नेकपा माओवादी केन्द्रका अध्यक्ष प्रचण्डले कम्युनिष्ट र कांग्रेस मिलेर गठबन्धन बनाइनु स्वभाविक रहेको टिप्पणी गरेका छन् । पाँच दलीय गठबन्धनले काठमाडौंमा गरेको वाग्मती प्रदेश स्तरीय कार्यकर्ता भेलामा प्रचण्डले सत्ता गठबन्धनका सत्ताका लागि मात्रै नभएको दाबी गरे । उनले भने, ’गठबन्धन चुनाव जित्ने र सरकार बनाउनेमा मात्रै होइन ।’
नेपाल विद्युत प्राधिकरणले लक्ष्मीपूजाकै दिन ३८० मेघावाट विजुली भारत निर्यात गरेको छ । प्राधिकरणका अनुसार लक्ष्मीपूजाको दिन विद्युतको उच्चतम माग १ हजार ३ सय मेगावाट रहेको र १ हजार ६ सय ८५ मेघावाट विजुली उत्पादन भएको छ । भारत निर्यात हुन नसकेको र नेपालमै समेत खपत हुन नसकेको २०० मेघावाट विजुली भने खेर गएको छ ।
निर्वाचन आयोगले प्रतिनिधिसभा र प्रदेशसभा निर्वाचनका क्रममा सरकारी साधन स्रोतको दुरुपयोगबारे निगरानी गर्न अख्तियार दुरुपयोग अनुसन्धान आयोगलाई पत्राचार गरेको छ । आयोगले सरकारी स्रोतको प्रयोग कानुन अनुसार भयो कि भएन भन्नेबारे आवश्यक निगरानी र अनुसन्धान गर्न अख्तियारलाई भनेको हो ।
भोलि दिउँसो सूर्यग्रहण लाग्दैछ । दिउँसो ४ बजेर ५२ मिनेटदेखि झण्डै ३३ मिनेटसम्म नेपालमा सूर्यग्रहण देखिने नेपाल एस्ट्रोनोमिकल सोसाइटीले जनाएको छ । दिउँसो लाग्ने खण्डग्रास सूर्यग्रहण पहाडी र खुल्ला क्षेत्रबाट मात्रै देखिन्छ । खण्डग्रास सूर्यग्रहणमा चन्द्रमाले सूर्यको केही भाग मात्र छेकेको देखिन्छ ।
राष्ट्रपति विद्यादेवी भण्डारीले तिहार पर्वले प्रकृति, मानव र प्राणी जगत्को अन्योन्याश्रित सम्बन्धलाई सजीव रूपमा चित्रण गर्ने गरेको बताएकी छन् । तिहारको शुभकामना सन्देश जारी गर्दै राष्ट्रपति भण्डारीले भनेकी छन्, ‘अर्कातिर दाजुभाइ तथा दिदीबहिनी बीचको पवित्र र आत्मिय सम्बन्धलाई प्रगाढ बनाउँदछ ।’
बेलायतको प्रधानमन्त्रीमा भारतीय मूलका ४२ वर्षीय ऋषि सुनक हुने भएका छन् । भारतीय मुलका सुनक सत्तारुढ कञ्जरभेटिभ पार्टीको नेतामा सर्वसम्मत चयन भएसँगै बेलायती इतिहासकै पहिलो अश्वेत तथा हिन्दू प्रधानमन्त्री बन्ने भएका हुन् । भावी प्रधानमन्त्रीको दौडमा रहेका पूर्वप्रधानमन्त्री बोरिस जोन्सनले आइतबार साँझ आफू प्रतिस्पर्धाबाट बाहिरिएको घोषणा गरेका थिए ।
