काठमाडौं । समाजवादी मोर्चामा डा.बाबुराम भट्टराई पनि रहने सम्भावना बढेको छ । शुक्रबार बिहान प्रधानमन्त्री पुष्पकमल दाहाल प्रचण्डलाई बालुवाटारमा भेटेपछि बाबुरामले बाहिर आएको हल्लामा विश्वास नगर्न आग्रह गर्दै बृहत् समाजवादी मोर्चा गठन गर्न गम्भीर छलफल गर्दै अघि बढ्ने समझदारी भएको उनले जानकारी दिएका छन् ।
उनले प्रधानमन्त्री प्रचण्डसँग हालैको उनको भारत भ्रमण, टीआरसी विधेयकसहित बाँकी रहेका शान्ति प्रक्रियाका काम, संघीय बजेट, प्रस्तावित समाजवादी मोर्चालगायतका विषयमा गम्भीर कुराकानी भएको बताए । ‘समाजवादी मोर्चा निर्माण गर्न विचार, नीति, कार्यक्रम, संगठनात्मक विधिलगायतका विषयमा सम्भव सबै पक्षबीच गम्भीर छलफल गर्दै अघि बढ्ने समझदारी भएको छ । बाहिर चलेका हल्लामा नबग्न सबैसँग आग्रह गर्दछु,’ उनले भने ।
माओवादी, एकीकृत समाजवादी जसपा, नेत्रविक्रम चन्द विप्लव नेतृत्वको नेकपा, नेपाल समाजवादी पार्टी सम्मिलित समाजवादी मोर्चा गठन गर्ने तयारी अघि बढेको छ । त्यसका लागि शुक्रबार सबै दलका नेताको बैठक बस्दैछ । त्यसअघि नै बाबुरामले प्रधानमन्त्री प्रचण्ड भेटेका हुन् ।
