काठमाडौं । प्रधानमन्त्री पुष्पकमल दाहाल प्रचण्डले सत्ता साझेदार १० दलको बैठक बोलाएका छन् । बैठक आज दिउँसो साढे २ बजे सिंहदरबारमा बस्ने छ ।
नीति तथा कार्यक्रम र बजेटमा सुझाव माग्न सत्ता समथैक १० दललाई बोलाइएको प्रधानमन्त्री तथा मन्त्रिपरिष्दको कार्यालयले जनाएको छ । बैठकमा नेपाली कांग्रेस, माओवादी, एकीकृत समाजवादी, जनता समाजवादी पार्टी, लोकतान्त्रिक समाजवादी पार्टी, नेपाल समाजवादी पार्टी, नागरिक उन्मुक्ति, जनमत पार्टी, राष्ट्रिय जनमोर्चा, आम जनता पार्टीलाई बोलाइएको छ ।
सरकारले जेठ ५ गते संसदमा नीति तथा कार्यक्रम ल्याउँदैछ । राष्ट्रपति रामचन्द्र पौडेलले सरकारको नीति तथा कार्यक्रम बाचन सुरु गरेर प्रधानमन्त्री प्रचण्डलाई अगाडि बाचन गर्न दिने भएका छन् ।
दोस्रोपटक संसदबाट विश्वासको मत लिएपछि एकचोटि पनि सत्ता गठबन्धनको बैठक बस्न सकेको छैन । बरु कांग्रेस, एमाले र माओवादीका शीर्ष नेताबीच छलफल र भेटघाट हुने गरेका छन् । यस्तो भेटवार्तामा सहभागी नगराइएको भन्दै एकीकृत समाजवादीका अध्यक्ष माधवकुमार नेपाल असन्तुष्ट छन् । नक्कली शरणार्थी प्रकरणको विषयमा छलफल गर्न बसेको बैठकमा बाइपास गरिएको नेपालको गुनासो छ ।
