नेपालजस्तो देशमा पर्याप्त विकासका पुर्वाधार निर्माण नहुनुमा भौगोलिक विकटता, डाँडाकाँडा, भीरपाखा आदिको अवरोध देखाउँछौँ । तर दृढ इच्छाशक्ति र प्रतिबद्धता भयो भने विकास गर्न कुनै कठिनाइले छेक्दैन भन्ने कुराको उदाहरण स्पेनको बोडे गास सहर बनेको छ ।
यो शहर एउटा भीमकाय चट्टानी पहरो मुनि लुकेको जस्तै देखिन्छ । ओडारजस्तो भीमकाय चट्टानको ओतमा घर बनेका छन् । मानौँ चट्टानले घरलाई थिचिरहेको छ । झन्डै तीन हजार जना मान्छे बस्ने यो आदिम युगको भीमकाय गुफा–नगर जस्तै देखिने शहरमा घरहरु भने आधुनिक पाराका, चम्किला र चिटिक्कका छन् । घरहरुमा भित्री पर्खाल प्राकृतिक चट्टानकै छ । त्यसैले केवल बाहिरी पर्खाल मात्र ठड्याइएको छ । धेरैमा छानोको काम पनि एउटै पहरोले नै गरेको छ ।
कान्डिज क्षेत्रको उत्तरपूर्वमा पर्ने यो शहरमा रियो क्रेजो नदीको साँघुरो गल्छी क्षेत्रमा अवस्थित छ । यो बस्नी निकै पुरानो तथा ऐतिहासिक रहेको बताइन्छ । आधुनिक सुविधाको समेत यहाँ कुनै कमी छैन । बार, रेष्टुरेन्टदेखि लिएर विभिन्न खानेकुराका परम्परागत तथा आधुनिक परिकार समेत यहाँ पाइन्छन् । यो शहरको पूरा नाम सेटेनिल डी लास बोडेगास हो ।
साभार ः ‘रोचक तथ्य’ पुस्तकबाट
