काठमाडौं । हालै सम्पन्न उपनिर्वाचनमा नेपाली कांग्रेसले ठूलो क्षति बेहोरेपछि पार्टीमा सुधारको आवश्यकता रहेको टिप्पणी र विश्लेषण भइरहेको छ । पार्टीका समर्थक र शुभेच्छुकले कांग्रेसलाई तलैदेखि माथिसम्म सुधार गर्नुपर्ने सुझाव दिइरहेका बेला कांग्रेस महामन्त्रीद्वय गगन थापा र विश्वप्रकाश शर्माले पार्टीमा रूपान्तरण अनिवार्यता भइसकेको निष्कर्ष निकालेका छन् ।
महामन्त्री थापाले पार्टीमा रुपान्तरण गर्न जुनसुकै कठोर निर्णय लिन पनि तयार हुनुपर्ने परिस्थिति आएको बताएका छन् । उनले पार्टीमा रुपान्तरणको यात्रा प्रारम्भ भइसकेको र अब जुनसुकै निर्णय लिन पनि तयार हुनुपर्ने परिस्थिति बन्दै गएको बताएका हुन् । उपनिर्वाचनमा निर्वाचित तीनवटै क्षेत्रका सांसदहरुलाई बुधबार सामाजिक सन्जालमार्फत बधाई दिँदै थापाले जनताको चाहनाबमोजिम कांग्रेसलाई अझै लोकतान्त्रिक, प्रगतिशील, समावेशी र निर्णायक राजनीतिक शक्तिको रुपमा स्थापित गर्ने घोषणा पनि गरे ।
‘पार्टी रुपान्तरण र सुदृढीकरणको यात्रा प्रारम्भ भइसकेको छ । हामीलाई अल्मलिने न छुट छ न त समय नै । यही समर्पित र संगठित प्रयत्नले परिणाम पनि उत्साहजनक बनाउने ठाँउमा हामी छिट्टै नै अवश्य पुग्नेछौं भन्ने मलाई दृढ विश्वास छ,’ उनले भनेका छन्, ‘पार्टीलाई रूपान्तरण गरी जनचाहनाअनुसार अझै लोकतान्त्रिक, प्रगतिशील, समावेशी र निर्णायक राजनीतिक शक्तिको रुपमा नेपाली कांग्रेसलाई स्थापित गर्नेछौं । र, जननायक बीपी कोइरालाको परिकल्पना अनुरुपको “समुन्नत नेपाल सम्मानित नेपाली” को हाम्रो संकल्प पूरा गर्नेछौं ।
नेता थापाले उपनिर्वाचनको परिणामले कांग्रेसलाई दिएको सन्देशका सन्दर्भमा भएको बहसले कांग्रेस रुपान्तरणको अभियानमा मद्दत नै पुग्ने विश्वास रहेको पनि उल्लेख गरेका छन । ‘उपनिर्वाचनको परिणामले विशेषगरी नेपाली कांग्रेसलाई दिएको सन्देश के हो, र यो सन्देशलाई पार्टीले कसरी लिनुपर्छ भन्नेलगायतका सन्दर्भमा सार्वजनिक बहस र विश्लेषण भइरहेका छन् ।
पार्टीभित्र र पार्टी बाहिर देश विदेशमा रहनुभएका शुभेच्छुक, समर्थक तथा आम मतदाता समेत विभिन्न माध्यमबाट बहसमा सहभागी हुनु भएको छ,’ उनी भन्छन् ‘राजनीतिप्रतिको यो चासो र चिन्ताले नेपालको राजनीतिको शुद्धीकरण र नेपाली कांग्रेस रूपान्तरणको अभियानलाई थप मद्दत पुग्छ भन्ने म ठान्दछु ।’
यस्तै, अर्का महामन्त्री शर्माले उपनिर्वाचनको परिणामले कांग्रेसमा रूपान्तरणको आवश्यकता देखिएको बताएका छन्। ‘परिणामले हामीलाई रूपान्तरित हुन सन्देश दिएको छ। देशको समय बदल्न नेतृत्व गरेको दलले बदलिएको समयअनुरूप आफूलाई बदल्नुछ। नवीन अभियानमा, नयाँ ढंगले जुट्नेछौँ,’ महामन्त्री शर्माले ट्विट गर्दै भनेका छन्। उपनिर्वाचनमा चितवन २ को कमान्ड महामन्त्री शर्मा र तनहुँको निर्वाचन कमान्ड महामन्त्री गगन थापाले गरेका थिए।
युवा मत आकर्षित गर्न सक्ने आकलनसहित सभापति शेरबहादुर देउवाले महामन्त्रीद्वयलाई जिम्मेवारी दिएका थिए। तर, कांग्रेसले दुवै क्षेत्र गुमाएको छ । त्यति मात्र होइन, कांग्रेसले आफ्नै मतसमेत जोगाउन नसकेपछि अहिले पार्टीमा सुधारको आवश्यता महसुस गरिएको हो ।
