प्रोटिनका अन्य मूल स्रोत जस्तै – पनिर, राजमा, च्याउ तथा मांसाहार नभएको दिन मात्रै दाल खनु स्वास्थ्य र पोषण–सन्तुलनको हिसाबले हितकारी हुन्छ ।
दालमा हरियो पत्तायुक्त साग मिसाई पकाएमा त्यो त्यति धेरै अम्लकारक हुँदैन ।
बोटबाट टिप्ने बित्तिकैका ताजा दाल, जस्तो हरियो मटर, हरियो भटमास (कोसाबाट निकालेको) हरियो बोडी, हरियो मुङ वा चना आदिमा क्षारतत्व र अन्य अपरिष्कृत पोषण पर्याप्त हुने हुँदा शङ्का नगरी खान सकिन्छ ।
हरियोपना हराई सुकेर सारो हुँदै गएको दालमा अम्ल तत्व र प्रोटिनको मात्रा पनि बढ्दै जाने हुनाले सकेसम्म कमसेकम ताजा नै खाने गर्नु राम्रो हो । अचेलको सहरिया जीवनशैलीमा हरियो दाल कल्पनाजस्तो भएको छ । यस्तो स्थितिमा दालको प्राकृतिक गुणपत्तालाई केही अंशमा फर्काउन सकिन्छ । यसका लागि पकाउनुपूर्व दाललाई १०–१२ घण्टा जति भिजाइदिने र बोक्रासहित भए टुसा निस्कन दिएर मात्र प्रयोग गर्ने हो भने हानिकारक अम्ल र प्रोटिनको उपस्थिति कम हुन जान्छ र ग्राह्य पोषक तत्वमा वृद्धि हुन्छ ।
साभारः ‘खाने कसरी पिउने कसरी’ पुस्तकबाट
