मनुका केही अमर वाणीहरुः
१) जुन ठाउँमा नारीको पूजा र आदर हुन्छ देवताहरु त्यहीँ रमाउँछन् र जहाँ तिनको अपमान हुन्छ त्यहाँ गरिएका सम्पूर्ण यज्ञादि कर्महरु निष्फल हुन्छन् । जुन परिवारमा कुलका छोरी–बुहारीले दुःख पाएका हुन्छन् त्यस कुलको चाँडै नै नाश हुन्छ । जहाँ यिनले अलिकति पनि दुःख पाउनु पर्दैन त्यस कुलको सधैँ फलिफाप र उन्नति हुन्छ ।
२) सम्पत्ति थोरै भए पनि वेदको अध्ययनबाट समृद्ध कुललाई असल कुलका रुपमा गनिन्छ र तिनीहरु यशस्वी हुन्छन् ।
३) वेदपाठले ब्रह्मयज्ञ, पितृको तर्पणले पितृयज्ञ, हवनले देवयज्ञ, पशुपन्छीलाई अन्नको बलि दिनाले भूतयज्ञ र अतिथिको आदरसम्मान गर्नाले मनुष्ययज्ञ सम्पन्न हुन्छन् । यिनै पञ्चमहायज्ञ हुन् ।
४) देवता, अतिथि, माता–पिता, आफूले पाल्नुपर्ने र आफूलाई पाल्न नसक्ने आश्रितहरुको जसले रक्षा गर्दैन त्यो मानिस सास फेरिरहेको भए पनि मृतक सरह नै हो ।
५) उत्तम रितले अग्निमा दिइएको आहुति सूर्यलाई प्राप्त हुन्छ । सूर्यबाटै वर्षा हुन्छ, वर्षाले अन्नको उत्पादन हुन्छ र प्रजाको उन्नति हुन्छ ।
६) हावाको सहयोगले सम्पूर्ण प्राणी बाँचे जस्तै गृहस्थाश्रमका भरोसामा सबै आश्रमीहरु बाँचेका हुन्छन् ।
७) कमजोर इन्द्रीय भएका मानिसले गृहस्थाश्रमको धर्म पालन गर्न सक्दैन । स्वर्गमा सुख पाउन खोज्नेले र यस लोकमा पनि सुखको खोजी गर्नेले अति जतनसाथ गृहस्थाश्रमको पालन गर्नुपर्दछ ।
८) वेदाध्ययनले ऋषिहरुलाई होम गरेर देवतालाई श्राद्ध र समर्पणले पितृहरुलाई अन्नले अतिथिलाई र चारो दिएर पशुप्राणीलाई सत्कार गर्नुपर्दछ ।
साभारः ‘महापुरुषहरुका अमर वाणी’ पुस्तकबाट
