पोखरा, १९ चैत । नेपाली नाट्य कर्मीले तयार पारेको इम्ब्रियोनिक नाटक जापानमा मञ्चन गरिने भएको छ । इन्द्रेणी थिएटरको प्रस्तुति रहेको उक्त नाटक आउँदो अप्रिल ८ गते शनिबार र अप्रिल ९ गते आइतबार जापानको इताबासी स्थित सबटेरेनियम थिएटरमा मञ्चन गरिने उक्त संस्थाद्धारा आइतबार पोखरामा आयोजित पत्रकार सम्मेलनमा वताइएको छ ।
इन्द्रेणी थिएटरका अध्यक्ष केदारनाथ पौडेलले इम्ब्रियोनिक नाटकमा मानव विकासक्रम र हन्त्यसम्मको सघंर्षगाथामा आधारित रहेको बताउनुभयो । ‘कला क्षेत्रमा सबै कलाका बिधा प्रयोग गरेर केही नौलो प्रस्तुति जन्माउन खोजिएको उक्त नाटकलाई थप परिस्कृत गर्दै जापान लान लागिएको हो,’ अध्यक्ष पौडेलले भन्नुभयो । टिकटमा प्रस्तुत गरिने उक्त नाटक जापानमा दुई सो प्रदर्शन गर्न लागिएको बताइएको छ ।
केही महिना अघिमात्र तयार भएको उक्त नाटक कास्कीको पोखरा–१९ को ढिकीडाँडा रिसोर्ट, पोखरा थिएटर र काठमाण्डौंको मण्डला थिएटरमा प्रदर्शन गरिएको जानकारी अध्यक्ष पौडेलले दिनुभयो । उक्त नाटक प्रदर्शन गर्न इन्द्रेणी थिएटरका अध्यक्ष एवंम नाटकको लेखन निर्देशन केदारनाथ पौडेल र सोही संस्थाका कपील शर्मा र दीपेन्द्र पौडेल जापान लान लाग्नु भएको हो ।
नाटकमा संगीत शिवहरि अर्याल र अर्जुन गुरुङले निर्माण गर्नुभएको हो । नाटक तयार पार्नका लागि गण्डकी प्रज्ञा प्रतिष्ठानले सहयोग गरेको जानकारी पत्रकार सम्मेलनमा दिइएको छ । वि.स. २०७६ सालमा स्थापना भएको इन्द्रेणी थिइटर स्थापना कालदेखि नाटक तथा साहित्यका अन्य विधामा काम गर्दै आएको जानकारी सो अवसरमा दिइएको छ ।
