भटमास स्वादिष्ट र गुणकारी खाद्यपदार्थ हो । यसमा प्रशस्त प्रोटिन र फाइटोकेमिकल पाइन्छन् । एसियाली मुलुकमा भटमास हजारौँ वर्षदेखि भोजनका रुपमा प्रयोग हुँदै आएको छ । भटमासको खाने तेल विश्वभरि प्रसिद्ध छ । नेपालमा भटमास विभिन्न तरिकाले खाने गरिन्छ । भुटेको मकै र भटमास मिसाएर पनि खाइन्छ । पश्चिमी मुलुकमा भटमासको दूध र भटमासको वर्गर लोकप्रिय हुँदै गएका छन् ।
भटमासमा हाम्रो शरीरलाई चाहिने सबै एमिनो एसिड पाइन्छ । पूर्ण रुपको प्रोटिन भएकोले शाकाहारीले यसको सेवन बढी गर्नुपर्दछ । चिनियाँमा गरिएको अध्ययनअनुसार भटमासबाट बन्ने परिकार बढी सेवन गर्नेमा स्तन क्यान्सर हुने सम्भावना कम हुन्छ ।
धेरै अध्ययन एवम् अनुसन्धानले के देखाएका छन् भने भटमासमा एस्ट्रोजेनिक गुण भएका पोलिफेनोल (फाइटोएस्ट्रोजन) हुन्छ । एस्ट्रोजन हर्माेनले महिलामा वयस्क गुण विकासका लागि महत्वपूर्ण भूमिका खेल्छ । महिनावारी बन्द भएका महिलामा एस्ट्रोजनको मात्रा घटेर जाने भएकोले विभिन्न स्वास्थ्य समस्या देखा पर्छन् । त्यसैले शरीरमा घटेको एस्ट्रोजन परिपूर्ति गर्न भटमासजन्य पदार्थ खानु लाभदायक हुन्छ ।
साभारः ‘जीवन जिउने काइदा’ पुस्तकबाट
