काठमाडौं – त्रिभुवन अन्तर्राष्ट्रिय विमानस्थलका व्यापारीहरुले उपभोक्ताबाट चर्को मूल्य असुली रहेका छन् । चिया कफी लगायत बजारमा पाईने हरेक सामाग्री विमानस्थल भित्रका पसलेहरुले उपभोक्ता मूल्यभन्दा दोब्बर/तेब्बर बढाएर उपभोक्तालाई ठगिरहेका छन् ।
वाणिज्य, आपूर्ति तथा उपभोक्ता संरक्षण विभागले प्रति लिटर पानीको अधिकतम खुद्रा मूल्य १६ रुपैयाँ तोकेको छ । तर बजारमा जुनसुकै पसलमा गएपनि १ बोतल पानी २० रुपैंयामा पाइन्छ । तर त्रिभुवन अन्तर्राष्ट्रिय विमानस्थलमा एक बोतल पानीका लागि ५० रुपैयाँ तिर्नुपर्छ । उपभोक्ता संरक्षण ऐन अनुसार वस्तुको बाहिरपट्टि लेखिएको अधिकतम खुद्रा मूल्य अर्थात (एम.आर.पि) भन्दा बढी पैसा लिन पाईदैन् । तर, विमानस्थलका व्यापारीहरुले दैनिक हजारौ उपभोक्ताहरुलाई ठगिरहेका छन् ।
बाहिर २० रुपैयाँमा पाईने सामान्य कालो चिया खानुपर्यो भने यहाँ ८० रुपैँया तिर्नुपर्छ । काठमाडौंका चिया कफी पसलमा क्यापाचिनो कफीको १ सय ७० रुपैंया पर्छ भने विमानस्थलमा यसलाई २ सय ५० रुपैयाँ तिर्नुपर्छ । यी त केही उदाहरण मात्रै हुन । विमानस्थलका व्यापारीहरुले हरेक सामानमा मनपरी शुल्क लिएर उपभोक्ता ठग्ने गरेका छन् । विमानस्थल भित्रै पनि एउटै वस्तुको मूल्य फरक फरक छ ।
वाणिज्य, आपूर्ति तथा उपभोक्ता संरक्षण विभागले फागुन ४ गते विमानस्थल भित्रका आन्तरिक र बाह्य तर्फका पसलहरुको अनुगमबाट उपभोक्ता ठग्ने ९ वटा पसललाई १५ लाख जरिवाना तिरायो । तर अहिले फेरी पसलेहरुले पुरानै मूल्य कायम गरेको प्रति भने विभाग बेखबर छ ।
विमानस्थलमा चिया खाने पैसाले बाहिर पेटभरी खाना खान सकिन्छ । यहाँ देशविदेश आवतजावत गर्नेहरु पानी देखि खाजा सम्मको खरिदमा दैनिक ठगिने गर्छन् । कतिपय जानी जानी कतिपय अन्जानमा । विमानस्थलले भने व्यापारीहरुलाई भाडामा लगाउने क्रममा कुन कुन सामान राख्ने भनेर सम्झौता भएपनि मूल्यका विषयमा कुनै सम्झौता नहुने भन्दै पन्छिन्छ । उपभोक्ता ठगिए त्यसको जिम्मेवार व्यापारी हुनुपर्ने विमानस्थलको तर्क छ ।
मूल्य समायोजनका विषयमा विमानस्थलले केही पनि गर्न नमिल्ने गैरजिम्मेवार जवाफ पचाउनै नसकीने खालको छ । त्यहाँका व्यापारीहरुले वर्ग फिटका हिसाबले महंगो भाडा तिर्ने गरेका छन् । सोही भाडाका कारण पनि सामान महंगो भएको व्यापारीहरुको भनाइ छ बाहिरी पसलका कुनै पनि व्यापारीले अधिकतम खुद्रामुल्य भन्दा बढी लिनै पाउँदैनन् । तर, विमानस्थलका व्यापारीले यो नियमको खुलेआम धज्जीउडाइ रहेका छन् । दैनिक लाखौ व्यापार हुने ठाउँमा भाडा महंगो भएकै कारण उपभोक्ता ठग्ने छुट उनिहरुलाइ छैन ।
