काठमाडौं । नेपाली सेनाको जंगीअड्डाको निर्णयविरुद्ध सर्वोच्च अदालत गएका उपरथी प्रेम शाही दुई महिनापछि थुनामुक्त भएका छन् ।
जंगीअड्डाभित्रै थुनेर राखिएका उच्च सैनिक अधिकृत शाहीसहित उनलाई सहयोग गरेको अभियोगमा समातिएका प्राड विवाकका प्रमुख सेनानी कुलदिप तिमसिना र महासेनानी महेन्द्रजंग शाह पनि थुनामुक्त भएका छन् । तिमसिना र शाहको दुई वर्ष बढुवा रोक्का गर्ने आदेश भएको छ ।
उपरथी शाही संलग्न सैनिक विद्रोहको कसूरसम्बन्धी मुद्दा पुर्पक्षका लागि भन्दै बुधबार जंगीअड्डा बोलाइएका तिमसिना र शाहलाई सेनाले नियन्त्रणमा लिएको थियो ।
पक्राउ पर्नेबित्तिकै परिवारका सदस्यले सर्वोच्च अदालतमा बन्दी प्रत्यक्षीकरणको रिट दर्ता गरेका थिए । सर्वोच्चका न्यायाधीश हरिप्रसाद फुयालको इजलासले दुवै जनालाई ३ दिनभित्र अदालतमा उपस्थितका आदेश जारी गरेका थिए ।
यस्तै नेपाली सेनाका उपरथी प्रेम शाही सेवाबाट बर्खास्त समेत भएका छन् र नेपाली सेनाका प्रवक्ता कृष्णप्रसाद भण्डारीका अनुसार सैनिक अदालतले शाहीलाई आर्थिक अनुशासन विपरीत आचरण गरेको आरोपमा दोषी ठहर गर्दै सेवाबाट बर्खास्त गर्ने सजाय सुनाएको हो ।
कोर्ट अफ इन्क्वाइरीपछि सैनिक मुख्यालयले उपरथी ताराध्वज पाण्डेको अध्यक्षतामा सैनिक अदालत गठन गरेको थियो । यो मुद्दामा जोडिएका अन्य महासेनानी महेन्द्रजङ्ग शाह र प्रमुख सेनानी कुलदिप तिमसिनालाई सामान्य कारबाही हुने फैसला भएको सैनिक मुख्यालयले जनाएको छ ।
नेपाली सेनाले आर्थिक अनियमितताको आरोप भनेपनि महासेनानी शाह र प्रमुख सेनानी तिमसिनालाई सैनिक मुख्यालय हाजिर हुने दिएको लिखित निर्देशनमा उनीहरु सैनिक विद्रोहमा संलग्न रहेको उल्लेख भएको छ ।
प्रवक्ता भण्डारीका अनुसार उनलाई सामान्य कार्बाही भने पनि पुर्ण रुपमा बुझ्न भने बाँकी नै रहेको छ । सर्वोच्च अदालतले अन्तरिम आदेश दिएपछि उनी कार्यालय हाजिर हुन पुगेपनि सैनिक मुख्यालयले नियन्त्रणमा लिएर अनुसन्धान सुरु गरेको थियो । सैनिक प्रवक्ता भण्डारीका अनुसार शाहीलाई भविष्यमा सरकारी सेवामा अयोग्य नठहरिने गरी बर्खास्त गर्ने फैसला भएको छ ।
