रसुवा। गृहमन्त्री सुधन गुरुङले रसुवा बाढीबाट प्रभावित क्षेत्रको स्थलगत निरीक्षण गर्दै खोज, उद्धार र शव सङ्कलन तथा राहत वितरणको कार्यलाई थप प्रभावकारी बनाउन सुरक्षा निकायलाई निर्देशन दिनुभएको छ ।
गृहमन्त्री गुरुङले बेत्रावती, मैलुङ, स्याफ्रुबेँसी, टिमुरे, घट्टेखोला, रसुवागढीलगायत बाढीबाट प्रभावित क्षेत्रको स्थलगत निरीक्षण गर्नुभएको रसुवाका प्रमुख जिल्ला अधिकारी तथा जिल्ला विपद् व्यवस्थापन समितिका अध्यक्ष नरेन्द्र परियारले जानकारी दिनुभयो ।
भोटेकोशीमा गएको बाढीले रसुवाका विभिन्न क्षेत्रमा ठूलो जनधनको क्षति पुर्याएको छ । बाढीले टिमुरे, घट्टेखोला, स्याफ्रुबेँसी, मैलुङ र बेत्रावतीलगायतका बजार तथा बस्तीमा घर, होटल, पसल, सडक, पुल तथा सार्वजनिक संरचनामा ठूलो क्षति पुगेको छ । कतिपय स्थानमा बाढीले बस्तीको स्वरूप नै परिवर्तन गरिदिएको छ भने ठूलो सङ्ख्यामा नागरिक बेपत्ता भएका छन् ।
स्थलगत निरीक्षणका क्रममा गृहमन्त्री गुरुङले जिल्ला विपद् व्यवस्थापन समितिले हालसम्म गरेको खोज तथा उद्धारकार्यप्रति सन्तोष व्यक्त गर्दै बाँकी रहेका कार्यलाई तीव्रता दिन जिल्लास्थित सुरक्षा निकायलाई स्पष्ट जिम्मेवारी तोक्नुभएको छ । उहाँको निर्देशनअनुसार नेपाली सेनाले खोज तथा उद्धार, नेपाल प्रहरीले शव सङ्कलन तथा व्यवस्थापन र सशस्त्र प्रहरी बलले राहत वितरणको जिम्मेवारी सम्हाल्नेगरी कार्यविभाजन गरिएको छ ।
बाढीका कारण प्रभावित क्षेत्रमा अझै बेपत्ता नागरिकको खोजी, शव सङ्कलन, घाइतेको उपचार तथा विस्थापित परिवारलाई खाद्यान्नलगायत अत्यावश्यक राहत सामग्री उपलब्ध गराउनुपर्ने अवस्था रहेको छ । गृहमन्त्री गुरुङको स्थलगत निरीक्षण तथा निर्देशनपछि बाढीबाट प्रभावित क्षेत्रमा उद्धार, शव सङ्कलन, खाद्यान्न वितरण तथा स्वास्थ्य उपचारलगायतका काम अझ व्यवस्थित र छिटोछरितो हुने प्रभावितले अपेक्षा गरेका छन् ।
विशेषगरी बाढीले सडक तथा यातायात संरचनामा क्षति पुर्याएका कारण प्रभावित बस्तीमा राहत तथा उद्धार सामग्री पुर्याउन चुनौती देखिएको छ । यस्तो अवस्थामा सुरक्षा निकायबीच स्पष्ट कार्यविभाजन भएपछि बाँकी रहेका बेपत्ताको खोजी, शव सङ्कलन तथा जीवित व्यक्तिको उद्धारमा थप सहजता हुने स्थानीयको विश्वास छ ।
