काठमाडौं । काठमाडौंको कुलेश्वरबाट प्रहरीले स्रोत नखुलेको ७६ लाख रुपैयाँ नगदसहित एक जनालाई पक्राउ गरेको छ । पक्राउ पर्नेमा पर्साको छिपहरमाई गाउँपालिका–१ का ३३ वर्षीय जितेन्द्र साह तुराह रहेका छन् ।
उपत्यका अपराध अनुसन्धान कार्यालय र प्रहरी वृत्त कालीमाटीबाट खटिएको टोलीले साहलाई नगदसहित पक्राउ गरेको हो । उनी कुलेश्वरस्थित आँचल फ्रुट सेन्टरका सञ्चालक रहेको प्रहरीले जनाएको छ ।
प्रहरीका अनुसार फलफूल पसलबाट १० लाख ७० हजार रुपैयाँ र साहले डेरामा लुकाएर राखेको अवस्थामा थप रकम बरामद भएको हो । डेराबाट ३ लाख ४ हजार भारतीय रुपैयाँसमेत बरामद गरिएको प्रहरीले जनाएको छ ।
बरामद रकमको स्रोतबारे साहसँग सोधपुछ भइरहेको काठमाडौंका प्रहरी वरिष्ठ उपरीक्षक दिलीप घिमिरेले जानकारी दिए । प्रहरीले रकमको स्रोत तथा कारोबारबारे थप अनुसन्धान अघि बढाएको छ ।
