काठमाडौं । राष्ट्रिय प्रजातन्त्र पार्टी (राप्रपा) ले हालको अवस्थामा कुनै पनि प्रदेश सरकारको सत्ता–समीकरणमा सहभागी नहुने निर्णय गरेको छ।
बुधबार बसेको पार्टीको केन्द्रीय कार्यसम्पादन समितिको बैठकले तत्काल प्रदेश सरकार गठन वा पुनर्गठनको गणितीय खेलमा नजाने निष्कर्ष निकाल्दै आवश्यक निर्णय लिनुपर्ने अवस्था आए पार्टीको समग्र हितलाई ध्यानमा राखेर उपयुक्त समयमा निर्णय गर्ने जिम्मेवारी अध्यक्ष राजेन्द्र लिङ्देनलाई दिएको हो।
बैठकले वर्तमान परिस्थितिमा प्रदेश सरकार नेपाली कांग्रेस, नेकपा एमाले र नेकपाकै सहभागितामा गठन हुनुपर्ने पार्टीको धारणा पनि स्पष्ट गरेको छ।
यससँगै राप्रपाले पार्टीको आधिकारिक निर्देशनबिना सत्ता–केन्द्रित कुनै पनि गतिविधिमा संलग्न नहुन सबै प्रदेश संसदीय दल तथा प्रदेशसभा सदस्यलाई निर्देशन दिएको छ।
पार्टीले प्रदेश सरकारसम्बन्धी आगामी रणनीति परिस्थितिअनुसार तय गरिने जनाएको छ।
