विराटनगर । गृहमन्त्री सुधन गुरुङ आज सिरहा जाने भएका छन्। सिरहामा उनी प्रहरीको गोली लागेर ज्यान गुमाएका गणेश यादवका परिवारसँग भेट गर्ने कार्यक्रम रहेको छ।
यो जानकारी गृहमन्त्री गुरुङले सुनसरीको देवानगञ्जमा दिनुभएको हो। बिहीबार राति उनले देवानगञ्ज गाउँपालिकाको कप्तानगञ्जमा झडपमा ज्यान गुमाएका दुई युवाका परिवारसँग भेटवार्ता गरेका थिए। उनको उपस्थितिमा पीडित परिवार र सरकारबीच सातबुँदे सहमतिपत्रमा हस्ताक्षर पनि भएको थियो।
देवानगञ्जबाट विराटनगर पुगेका गृहमन्त्री केही समय त्यहाँ बसेपछि सिरहातर्फ प्रस्थान गर्ने कार्यक्रम रहेको छ।
सुनसरीमा भएको हिंसात्मक घटनापछि विरोध प्रदर्शन चर्किँदा मधेश प्रदेशका विभिन्न जिल्ला तनावग्रस्त बनेका छन्। सिरहामा प्रदर्शनका क्रममा प्रहरीको गोली लागेर धनगढीमाई नगरपालिका–तुलसियाहीका गणेश यादवको मृत्यु भएको थियो।
गृहमन्त्री गुरुङले आज गणेश यादवका परिवारसँग भेट गर्नुका साथै जिल्लाको पछिल्लो सुरक्षा अवस्थाबारे प्रहरी प्रशासनका अधिकारीहरूसँग जानकारी लिने कार्यक्रम रहेको छ।
