सुनसरी । सुनसरीको देवानगञ्ज गाउँपालिका–३ मा साउन १० गते भएको घटनामा ज्यान गुमाएका ओमप्रकाश मेहता र जयप्रकाश मेहताका परिवार तथा नेपाल सरकारबीच सातबुँदे सहमति भएको छ।
बिहीबार राति गृहमन्त्री सुधन गुरुङको उपस्थितिमा गृह मन्त्रालय र पीडित परिवारबीच सम्झौतापत्रमा हस्ताक्षर भएको हो।
सम्झौताअनुसार सरकारले दुवै मृतकलाई सहिद घोषणा गर्ने प्रक्रिया तत्काल अघि बढाउने, प्रत्येक परिवारलाई १० लाख रुपैयाँ राहत उपलब्ध गराउने तथा घटनाको निष्पक्ष र प्रभावकारी छानबिन गरी दोषीमाथि प्रचलित कानुनबमोजिम कारबाही अघि बढाउने प्रतिबद्धता जनाएको छ।
यस्तै, देवानगञ्ज गाउँपालिका–३ मा रहेको मदरसाको कानुनी हैसियत तथा सम्बन्धित विषयमा आवश्यक छानबिन तत्काल सुरु गर्ने, प्रत्येक मृतकका परिवारबाट एक–एक जना योग्य सदस्यलाई रोजगारीको अवसर उपलब्ध गराउने तथा छानबिन समितिको प्रतिवेदनका सुझाव र सिफारिस कानुनबमोजिम कार्यान्वयन गर्ने सहमति भएको छ।
स्थानीय सरकारसँग समन्वय गरी मृतकहरूको सम्झनामा उपयुक्त स्थानमा स्मृति पार्क निर्माण गर्ने विषय पनि सहमतिमा समेटिएको छ।
सम्झौतापत्रमा पीडित परिवारका तर्फबाट दुवै मृतकका अभिभावक र सरकारका तर्फबाट गृहमन्त्री सुधन गुरुङले हस्ताक्षर गरेका छन्। साथै, दुवै मृतकको अन्त्येष्टि आज दिउँसो २ बजे गरिने उल्लेख गरिएको छ।
