काठमाडौं। फिफा विश्वकप २०२६ को अन्तिम १६ मा नर्वेसँग २–१ गोलले पराजित हुँदै ब्राजिल प्रतियोगिताबाट बाहिरिएपछि स्टार फरवार्ड नेयमारले अन्तर्राष्ट्रिय फुटबलबाट सन्यासको घोषणा गरेका छन्।
३४ वर्षीय नेयमारले खेलपछि भावुक हुँदै ब्राजिलका लागि आफ्नो १६ वर्ष लामो अन्तर्राष्ट्रिय यात्रा समाप्त भएको बताएका हुन्। अन्तिम सिटी बज्नेबित्तिकै केहीबेर निश्चल उभिएका उनी त्यसपछि भावुक बनेका थिए। उनका सहकर्मी खेलाडीहरूले अँगालो हालेर सान्त्वना दिएका थिए।
विश्वकपअघि नै चोट बोकेर प्रतियोगितामा पुगेका नेयमारले ब्राजिलका सुरुआती खेल गुमाएका थिए। त्यसपछि प्रशिक्षक कार्लो एन्सेलोटीको योजनाअनुसार उनले बिस्तारै टोलीमा पुनरागमन गरेका थिए। पूर्ण रूपमा फिट भएपछि पनि उनी अधिकांश समय वैकल्पिक खेलाडीका रूपमा मैदान उत्रिएका थिए। उनले स्कटल्यान्ड र नर्वेविरुद्ध बेन्चबाट खेल खेलेका थिए।
सन् २०१० मा ब्राजिलको सिनियर टोलीबाट डेब्यु गरेका नेयमारले १२९ अन्तर्राष्ट्रिय खेलमा ८० गोल गर्दै ब्राजिलका पुरुष फुटबलतर्फ सर्वाधिक गोलकर्ता बने।
उनले चार संस्करणको फिफा विश्वकप खेले र एक दशकभन्दा बढी समय ब्राजिलको आक्रमणको नेतृत्व गरे। तर विश्वकप उपाधि जित्ने उनको सपना भने पूरा हुन सकेन।
नेयमारले सन् २०१३ मा फिफा कन्फेडेरेसन कप जितेका थिए। कप्तानका रूपमा उनले सन् २०१६ को रियो ओलम्पिकमा ब्राजिललाई पहिलो पटक स्वर्ण पदक दिलाएका थिए। सन् २०१२ को लन्डन ओलम्पिकमा उनले रजत पदक पनि जितेका थिए।
