भेनेजुएलाको राजधानी काराकास आसपास शक्तिशाली भूकम्प गएको छ । भूकम्पबाट भवनहरू भत्किएका छन् भने उद्धार कार्य तीव्र पारिएको छ। अमेरिकी भूगर्भ सर्वेक्षण (यूएसजीएस) ले ठूलो जनधनको क्षति हुन सक्ने चेतावनी दिएको छ ।
यूएसजीएसका अनुसार काराकासबाट करिब १६० किलोमिटर पश्चिममा ७.२ म्याग्निच्युडको भूकम्प गएको एक मिनेट नबित्दै ७.५ म्याग्निच्युडको अर्को शक्तिशाली धक्का महसुस गरिएको थियो । भूकम्पपछि राजधानी काराकाससहित विभिन्न क्षेत्रमा भवनहरू भत्किएका छन् । भग्नावशेषमा पुरिएकाहरूको उद्धारका लागि सुरक्षा निकाय, दमकल र आपत्कालीन टोली परिचालन गरिएको छ ।
यूएसजीएसले प्रारम्भिक मूल्याङ्कनमा मृतक संख्या १० हजारदेखि एक लाखसम्म पुग्न सक्ने अनुमान गरेको छ। यद्यपि सरकारी निकायले हालसम्म मृतक तथा घाइतेको आधिकारिक विवरण सार्वजनिक गरेका छैनन्।
स्थानीय अधिकारीहरूका अनुसार केही क्षेत्रमा भवनहरू पूर्ण रूपमा ध्वस्त भएका छन् भने दर्जनौँ व्यक्ति घाइते भएका छन्। राजधानीको चाकाओ नगरपालिकामा मात्र दुई वटा भवन भत्किँदा कम्तीमा १६ जना घाइते भएको जनाइएको छ।
भूकम्प आउँदा सार्वजनिक बिदा रहेकाले अधिकांश नागरिक घरमै थिए। शक्तिशाली कम्पन महसुस हुनासाथ मानिसहरू घर तथा कार्यालयबाट बाहिर निस्किएर सडकमा जम्मा भएका थिए।
प्रत्यक्षदर्शीहरूले घरभित्रका सामानहरू खसेको, भवनहरू तीव्र रूपमा हल्लिएको तथा मानिसहरू त्रसित भएर भागेको बताएका छन्।
अधिकारीहरूले क्षतिको पूर्ण विवरण आउन अझ समय लाग्ने बताएका छन् भने उद्धार तथा खोजी कार्य रातभर जारी रहने जनाएका छन् ।
