काठमाडौं। जल तथा मौसम विज्ञान विभागले आज सुदूरपश्चिमदेखि कोशी प्रदेशसम्मका विभिन्न जिल्लामा तीव्र हावाहुरीको पूर्वानुमान गर्दै सतर्कता अपनाउन आग्रह गरेको छ।
विभागका अनुसार सुदूरपश्चिमका डडेलधुरा, डोटी, लुम्बिनीका बर्दिया, बाँके, दाङ, अर्घाखाँची, मधेसका धनुषा, बारा र कोशीका मोरङसहित आसपासका क्षेत्रमा तीव्र हावाहुरी चल्ने सम्भावना छ। हावाहुरी साँझ करिब ५ः४५ बजे सुरु भई भोलि बिहान ७ः४५ बजेसम्म रहने अनुमान गरिएको छ।
मेघगर्जन, चट्याङ, असिना र वर्षासहितको मौसम प्रणाली पश्चिमबाट पूर्वतर्फ सर्दै जाने भएकाले देशका धेरै स्थानमा प्रभाव पर्ने देखिएको छ।
आज दिउँसो कोशी, मधेस, वाग्मती, गण्डकी र लुम्बिनी प्रदेशका धेरै स्थानमा तथा कर्णाली र सुदूरपश्चिमका केही स्थानमा मेघगर्जन र चट्याङसहित मध्यम वर्षाको सम्भावना रहेको छ। कोशी र गण्डकीका पहाडी क्षेत्रमा एक–दुई स्थानमा भारी वर्षा हुन सक्ने विभागले जनाएको छ।
राति पनि अधिकांश पहाडी र हिमाली भूभागमा बदली रही धेरै स्थानमा वर्षा हुने सम्भावना छ।
