काठमाडौँ – नेपाली सेनाका दुई जना सहायकरथी पदम बुढा मगर र पवन खत्री उपरथीमा बढुवा भएका छन्। भावी नेतृत्वसँग जोडिएको कारण यो बढुवा निकै महत्वपूर्ण मानिएको छ। हाल बढुवा भएका बुढा ३६ र खत्री ३३ बेसिकका अधिकृत हुन्।
दुवै जना उपरथीमा बढुवा भएसँगै भावी प्रधानसेनापति बन्ने बाटो लगभग खुला भएको छ। आइतबारको मन्त्रिपरिषद् बैठकले उनीहरूलाई उपरथीमा बढुवा गरेको हो। बुढा मगर अनुपजंग थापापछि प्रधानसेनापति बन्ने लाइनमा देखिएका छन्।
पाकिस्तानबाट एनडीसी गरेका बुढा हाल नेपाली सेनाको तालिम निर्देशनालयमा कार्यरत छन्। वर्तमान प्रधानसेनापति अशोकराज सिग्देल ०८४ भदौ २४ मा अवकाश पाउँदैछन्। त्यसपछि वरियताक्रमअनुसार अनुपजंग थापा पहिलो नम्बरमा रहने भएकाले उनले तीन वर्ष सेनाको नेतृत्व सम्हाल्नेछन्। थापाको कार्यकाल ०८७ भदौसम्म रहनेछ।
यदि यसबीच कुनै परिवर्तन नभएमा, उपरथी मधुकर कार्की र प्रेम पुन तीन तारे जर्नेलमा बढुवा हुने सम्भावना छ। त्यसपछि बुढा मगर पनि तीन तारे जर्नेल बन्ने लाइनमा रहनेछन्। थापाको अवकाशपछि सेनाको नेतृत्व बुढा मगरको काँधमा पुग्ने देखिन्छ। यदि बुढा मगर प्रधानसेनापति बन्न नसकेको अवस्थामा खत्री त्यसको विकल्पमा रहनेछन्।
अमेरिकाबाट विभिन्न तालिम लिएका तथा संयुक्त राष्ट्रसंघको न्यूयोर्कस्थित मुख्यालयमा समेत काम गरिसकेका बुढा, आफुभन्दा सिनियर अधिकृतलाई पछाडि पार्दै ‘फास्ट ट्र्याक’ बाट बढुवा भएका अधिकारी हुन्। उनले आज सैनिक मुख्यालयमा प्रधानसेनापतिबाट उपरथी दर्जाको दर्ज्यानी चिन्ह प्रदान गर्दैछन्।
