काठमाडौँ । नेपाली कांग्रेसले समाज रूपान्तरणमा योगदान गर्न चाहने विभिन्न क्षेत्रका व्यक्तिहरूलाई पार्टीमा आवद्ध हुन आह्वान गरेको छ।
शुक्रबार बिहान पार्टी प्रवक्ता देवराज चालिसेले विज्ञप्ति जारी गर्दै वैकल्पिक शक्ति निर्माणमा विश्वास राख्ने तथा चिकित्सा, शिक्षा, कानून, उद्योग, सूचना–प्रविधि, कृषि, श्रम र नागरिक समाजका क्षेत्रमा सक्रिय व्यक्तिहरूलाई कांग्रेसमा आबद्ध हुन आग्रह गरेका छन्।
विज्ञप्तिमा बदलिँदो समय र रुपान्तरित राजनीतिक चेतनाअनुसार नेपाली कांग्रेस सुशासन, समावेशिता र समृद्धितर्फ देशलाई अग्रसर गराउने संकल्पका साथ अघि बढिरहेको उल्लेख गरिएको छ।
पार्टी सभापति गगनकुमार थापाको नेतृत्वमा संगठन सुदृढीकरण, नीतिगत स्पष्टता र जनविश्वास पुनःस्थापनालाई उच्च प्राथमिकता दिइएको प्रवक्ता चालिसेले बताएका छन्।
विज्ञप्तिमा नेपाली कांग्रेसलाई विचार, विवेक र प्रतिबद्धतामा आधारित लोकतान्त्रिक मञ्चका रूपमा वर्णन गरिएको छ। पारदर्शिता, जवाफदेहिता र नीतिमा आधारित राजनीतिलाई प्राथमिकता दिँदै राष्ट्र निर्माण र लोकतन्त्र सुदृढीकरणका लागि नयाँ सोच, ऊर्जा र अनुभवी व्यक्तिहरूको सहभागिता आवश्यक रहेको उल्लेख गरिएको छ।
कांग्रेसले लोकतान्त्रिक मूल्य र आदर्शलाई सशक्त बनाउने अभियानमा सहभागी हुन इच्छुक सबैलाई औपचारिक रूपमा पार्टीमा आबद्ध हुन आह्वान गरेको छ।
