काठमाडौँ । जेनजी आन्दोलनका क्रममा आगजनीमा परेका राजनीतिक दलका कार्यालयको स्थलगत अनुगमनका लागि सरकारी टोली सक्रिय भएको छ । सरकारद्वारा गठन गरिएको राजनीतिक संवाद समितिको टोलीले सानेपास्थित नेपाली कांग्रेसको जलेको केन्द्रीय कार्यालयको अनुगमन गरेको हो ।
टोलीले क्षतिग्रस्त कार्यालयको अवलोकन गर्नुका साथै कांग्रेसका प्रतिनिधिसँग घटनाबारे छलफल गरेको छ । अनुगमन टोलीमा कानुनमन्त्री अनिलकुमार सिन्हा, सञ्चारमन्त्री जगदीश खरेल र प्रधानमन्त्रीका मुख्य सल्लाहकार अजयभद्र खनाल सहभागी थिए ।
सरकारी टोलीले आजै नेकपा एमाले, नेपाली कम्युनिस्ट पार्टी (तत्कालीन माओवादी केन्द्र) लगायत अन्य दलका कार्यालयमा समेत पुगेर अनुगमन गर्ने कार्यक्रम तय गरिएको छ ।
गत भदौ २४ गते जेनजी आन्दोलनका क्रममा कांग्रेस, एमाले, तत्कालीन माओवादी केन्द्रलगायत विभिन्न राजनीतिक दलका कार्यालय, नेताहरूका निजी निवास, सिंहदरबार, संसद भवन, अदालत, प्रहरी कार्यालय, सपिङ मल तथा निजी व्यवसायिक प्रतिष्ठानमा आगजनी र तोडफोड भएको थियो । सरकार उक्त घटनाबाट भएको क्षति र समाधानका उपायबारे सरोकारवालासँग संवाद अघि बढाउने तयारीमा रहेको जनाएको छ ।
