सिरहा। सिरहामा विद्युत् चुहावटको दर हरेक वर्ष बढ्दै गएको छ। नेपाल विद्युत् प्राधिकरण, लहान वितरण केन्द्रका अनुसार आर्थिक वर्ष २०८०/८१ मा चुहावट ३१.६५ प्रतिशत रहेकोमा आव २०८१/८२ मा ३८.१० प्रतिशत पुगेको थियो। हालैको तथ्याङ्क अनुसार आव २०८२/८३ को साउनसम्म यो ४४.४६ प्रतिशत पुगेको छ।
वितरण केन्द्रका प्रमुख अवधेशकुमार गुप्ताका अनुसार चुहावटको मुख्य कारण कृषि मिटरको दुरुपयोग हो। उहाँले भन्नुभयो, “१७ हजार कृषि मिटर वितरण भए पनि किसानले पाँच हजार मात्र खेतमै प्रयोग गरेका छन्, बाँकी घरमै राखेर दुरुपयोग भएको छ।”
गुप्ताले विद्युत् चोरी नियन्त्रणमा कडाइ गरिने र कानुनी कारबाही कार्यान्वयन हुने बताए। प्राधिकरणले चोरी न्यूनीकरण गर्न मिटर समयमै उपलब्ध गराउने र स्थानीय तहसँग साझेदारीमा जनचेतनामूलक कार्यक्रम सञ्चालन गर्ने तयारी गरेको छ।
विद्युत् चोरी नियन्त्रण ऐन, २०५८ अनुसार चोरीबाट वितरकलाई हानि भएमा सोबापत क्षतिपूर्ति तिर्नुपर्ने र दोहोरिएमा वास्तविक हानिको २०० प्रतिशतसम्म क्षतिपूर्ति बुझाउनुपर्ने कानुनी व्यवस्था छ।
सिरहामा लहान, मिर्चैया र सदरमुकाममा तीन वितरण केन्द्र छन्। लहान वितरण केन्द्रअन्तर्गत लहान, सुखीपुर, धनगढीमाई, बरियारपट्टी, विष्णुपुर, औरही, लक्ष्मीपुर पतारी र भगवानपुर गाउँपालिका पर्छन्।
