काठमाडौँ । काठमाडौंको गोंगबु क्षेत्रमा प्रहरीले विशेष सूचनाका आधारमा छापा मार्दा करिब सवा चार करोड रूपैयाँ नगद र ९ किलोभन्दा बढी सुनका गरगहना बरामद गरेको छ।
मंगलबार दिउँसो ७६ वर्षीय विनोदकुमार श्रेष्ठको तीनतले घरमा छापा मारेर प्रहरीले अवैध सम्पत्ति र मिटरब्याजको जालो उजागर गरेको हो।
जिल्ला प्रहरी परिसर काठमाडौंका एसपी अपिलराज बोहराका अनुसार, घरबाट ४ करोड २५ लाख ५० हजार रूपैयाँ नगद बरामद भएको छ। ठूलो रकम भएकाले प्रहरीले पैसा गन्न बैंकबाट मेसिन समेत ल्याएको थियो।
प्रारम्भिक अनुसन्धानअनुसार, विनोदकुमार श्रेष्ठ मिटरब्याजको धन्दामा संलग्न थिए र ऋणीहरूबाट सुन धितोका रूपमा लिने गरेको आरोप छ। बरामद रकमको स्रोत खुलाउन नसकेपछि उनलाई नियन्त्रणमा लिइएको छ।
नगदका साथै प्रहरीले घरबाट ९ किलोभन्दा बढी सुनका गरगहना र ३ किलोभन्दा बढी चाँदीका गरगहना पनि बरामद गरेको छ। छापा काठमाडौं उपत्यका प्रहरी कार्यालय र जिल्ला प्रहरी परिसर काठमाडौंको संयुक्त टोलीले विशेष सूचनाका आधारमा हानेको थियो।
