मलेखु (धादिङ)। विस्तारको क्रममा रहेको पृथ्वीराजमार्ग बर्खामा जोखिमपूर्ण बनेको छ । कतै पिच, कतै ढलान बनेको भए पनि भित्ताबाट झर्ने स–साना ढुङ्गा, खाल्डाखुल्डी, हिलो र धुलाले यात्रुलाई गाह्रो बनाइरहेको छ ।
काठमाडौंबाट धादिङसम्मको मार्गमा पानी परेपछि पहिरो कहिले कहाँ जाने निश्चित छैन भने डोजरले खारिएका भित्ताबाट झर्ने ढुङ्गाबाट जोगिन पनि कठिन छ । माइक्रोबस चालक विकास श्रेष्ठका अनुसार “सडकको खाल्डोभन्दा पहिरो झर्ने स्थानमा बढी ध्यान दिनुपर्छ।” बुधबारदेखि निरन्तर पानी परेको कारण स–साना पहिरोले सडक थुनिएको भए पनि घण्टौँ कुर्नुपर्ने अवस्था भने छैन ।
त्रिभुवन राजपथको नागढुङ्गा–नौबिसे सडक खण्ड र पृथ्वी राजमार्गको नौबिसे–मुग्लिन सडक खण्ड बर्खामा विशेष जोखिमपूर्ण रहेको छ । सडक फराकिलो बनाउन काटिएका भित्ताबाट खसेको पहिरोले धेरै ठाउँ हिलो र धुलाम्मे भएको छ भने आधा निर्माण भएका खण्डका खाल्डाखुल्डीले सवारी साधन गुडाउन गाह्रो बनाएको छ ।
जिल्ला प्रहरी कार्यालयका प्रहरी नायब उपरीक्षक सुवास हमालले “पृथ्वी राजमार्ग जोखिमपूर्ण भए पनि हिँड्न नसक्ने अवस्था छैन,” भनेका छन् । उनका अनुसार सडक छियाछिया र अस्थिर रहेकाले चालकले सावधानी अपनाउनुपर्ने हुन्छ ।
मोटरसाइकल र स्कुटर चालकका लागि यो सडक बढी जोखिमपूर्ण छ । घाम परेको बेला धुलो, पानी परेको बेला चिप्लो लेदो बन्ने गर्दछ ।
जिल्ला ट्राफिक प्रहरी कार्यालय गजुरीका निरीक्षक सुरज श्रेष्ठले भने, “कहीँकतै विपद् नपरोस्, धनजनको क्षति नहोस् भनेर चौबिसै घण्टा प्रहरी खटिरहेका छौँ।”
नागढुङ्गादेखि मुग्लिनसम्मको ९६ किलोमिटर सडकमा निर्माणाधीन पुल र साँघुरा खण्डमा सवारी एकतर्फी हुने भएकाले प्रहरीले दुबैतर्फ खटेर चालकलाई सजग गराइरहेका छन् । सामान्य अवस्थामा दैनिक करिब १३ हजार र चाडपर्वमा २० हजारसम्म सवारी आवागमन हुने अनुमान गरिएको छ ।
