काठमाडौं, श्रावण ३० – काठमाडौंस्थित भारतीय दूतावासमा आज भारतको ७९ औं स्वतन्त्रता दिवस विशेष समारोहका साथ मनाइयो। नेपालमा रहँदै आएका भारतीय समुदायका सदस्य तथा भारतका मित्रहरूको सहभागितामा सम्पन्न कार्यक्रममा भारतीय राजदूतले राष्ट्रिय झण्डा आरोहण गर्दै औपचारिक सुरुवात गर्नुभयो।
समारोहमा भारतकी राष्ट्रपति श्रीमती द्रौपदी मुर्मुले स्वतन्त्रता दिवसको पूर्वसन्ध्यामा राष्ट्रका नाममा गर्नुभएको सम्बोधन प्रसारण गरियो। सम्बोधनमा उहाँले विगत ७८ वर्षमा भारतले हाँसिल गरेको उल्लेखनीय प्रगतिबारे प्रकाश पार्दै एकताबद्ध र समावेशी विकासको महत्वलाई जोड दिनुभयो।
यस अवसरमा राजदूतले भारतीय सशस्त्र बलका दिवंगत सैनिकका श्रीमती र निकटतम नातेदारलाई सम्मान गर्दै कुल नेरु. ६.४ करोड रकमको आर्मी ग्रुप इन्स्योरेन्स फण्ड (AGIF) अन्तर्गतको चेक हस्तान्तरण गर्नुभयो। साथै, दूतावासले नेपालका सातै प्रदेशका २१ जिल्लामा रहेका ३९ वटा विद्यालय तथा पुस्तकालयलाई पुस्तक अनुदान प्रदान गर्ने घोषणा गर्यो। यस पहलले विशेष गरी दुर्गम क्षेत्रका विद्यार्थीहरूलाई शैक्षिक सामग्रीमा पहुँच वृद्धि गर्ने उद्देश्य राखिएको बताइयो।
कार्यक्रममा भारतीय समुदायका सदस्य, दूतावासका अधिकारी तथा परिवारजन, र भारतप्रेमी नेपाली मित्रहरूले उत्साहपूर्वक सहभागिता जनाएका थिए। समारोहमा स्वामी विवेकानन्द सांस्कृतिक केन्द्र र केन्द्रीय विद्यालय, काठमाडौंका विद्यार्थीहरूले देशभक्तिपूर्ण गीत र जीवन्त सांस्कृतिक प्रस्तुति दिई वातावरणलाई उल्लासमय बनाएका थिए।
