युक्रेनका राष्ट्रपति भ्लोदिमिर जेलेन्स्कीले आफ्नो एक इन्च पनि जमिन नछोड्ने अडान लिएका छन्। रुस-युक्रेन युद्ध अन्त्यका लागि यी दुबै राष्ट्रले आफ्ना विवादित भूमिका केही अंशहरू ‘सट्टापट्टा’ गर्नुपर्ने अमेरिकी राष्ट्रपतिको भनाइपछि युक्रेनले आफ्नो प्रतिक्रिया दिएको हो।
यद्यपि जेलेन्स्कीले आफ्नो देशले युद्ध कहिल्यै नचाहेको भन्दै ‘स्थायी र वास्तविक’ शान्तिका लागि सधै तयार रहेको पनि बताएका छन्।
‘तर ट्रम्प र पुटिनले जुन ठाउँमा वार्ता गर्ने भनेका छन् त्यो युद्धभूमिबाट निकै टाढा छ र युक्रेनको सहभागिताबिना त्यो वार्ता वा संवादको कुनै औचित्य छैन’ जेलेन्स्कीले भनेका छन् ‘युक्रेनले अतिक्रमणकारी(रुस)लाई कहिल्यै पनि आफ्नो देशको कुनै पनि भूमि दिने छैन।’
आगामी शुक्रबार (अगस्ट १५)मा अलास्कामा सहरमा अमेरिकी राष्ट्रपति डोनाल्ड ट्रम्प र रुसका राष्ट्रपति भ्लादिमिर पुटिनबीच वार्ता तय भएको केही घण्टापछि युक्रेनको यस्तो प्रतिक्रिया आएको हो। यो वार्ताका लागि ट्रम्प र पुटिन दुबै आफूहरू उत्साहित भएको बताएका छन्।
यद्यपि यो वार्ताले नै युद्ध रोकिने छैन। तर युद्धबिरामबारे यो वार्ताले केही कार्यदिशा पनि भने तय गर्नेछ। किनकि दोस्रो वार्ताका लागि रुसले पहिला नै ट्रम्पलाई मस्कोमा निम्तो दिइसकेको छ।
सन् २०२२ को फेब्रुअरीमा रुसले आफ्नो छिमेकी राष्ट्रमाथि पूर्ण स्तरको अतिक्रमण आरम्भ गरेपछि यो युद्ध सुरु भएको थियो। हालसम्म युद्ध रोकिने कुनै संकेत देखिएका छैनन्। दोस्रो कार्यकाल सम्हालेसँगै ट्रम्पले यो युद्ध रोक्न अनेक प्रयास त गरिरहेका छन् र रुस र युक्रेनले वार्तामा बस्न र सम्झौता गर्न तयार भइरहेका छैनन्।
ट्रम्पको प्रस्तावका अनुसार हाल युक्रेनका केही भाग आफ्नो नियन्त्रणमा लिएको रुसले खेअरसन र जापोरिजा क्षेत्रहरू छाड्नका लागि सहमतिको संकेत दिएको छ।
ट्रम्प र पुटिनको भेट हुनुभन्दा अघि युरोपेली राष्ट्रहरूलाई त्यसमा सहमत गराउनका लागि अमेरिका लागि परेको छ। यसबीचमा अमेरिकी उपराष्ट्रपति जेडी भान्स र ब्रिटेनका विदेशमन्त्री डेभिड लेमीबीच भेटवार्ता भएको छ। लण्डन नजिकैको एक सहरमा उनीहरूबीच सुरक्षा अधिकारीका साथ बैठक भएको थियो।
यो बैठक युरोपेली सुरक्षा सल्लाहकार तथा युक्रेनका सुरक्षा अधिकारी पनि सहभागी भएका थिए। ब्रिटेनलगायत अधिकांश युरोपेली राष्ट्रहरू युक्रेनकै पक्षमा वकालत गर्दै आएका छन्।
