सिन्धुली घर भएका एक युवकको मिर्गौला निकालिएको प्रकरणमा नयाँ खुलासा आएको छ ।
रोजगारीको प्रलोभनमा भारत पुर्याइएका ती युवकको मृगौला निकालिएको घटना पीडितले थाहा नै पाएनन्। काठमाडौंको कोटेश्वरबाट सुरु भएको यात्रा अन्ततः चण्डीगढको एक क्लिनिकमा पुगेर मृगौला चोरीमा टुंगियो। पीडितले यो कुराको पत्तो पाएनन्। विस्तृत अनुसन्धानपछि प्रहरीले संगठित रुपमा मानव अङ्ग निकासीमा संलग्न तीन जनालाई पक्राउ गरेको छ ।
पक्राउ पर्नेहरुमा काभ्रेपलाञ्चोक पाँचखाल नगरपालिका–१० का ३५ वर्षीय कुमार भन्ने राजकुमार परियार, नुवाकोट बेलकोटगढी नगरपालिका–९ का २४ वर्षीय समिर नेपाली र सोही नगरपालिका–४ का ४७ वर्षीय राकेश नेपाली रहेका छन्।
मानव बेचबिखन तथा अनुसन्धान ब्युरोको विशेष अपरेसनमार्फत २०८२ साउन २१ र २२ गते उनीहरुलाई काभ्रे र काठमाडौंका विभिन्न स्थानबाट पक्राउ गरिएको हो।
ब्युरोको प्रारम्भिक अनुसन्धानअनुसार, पीडितलाई मासिक १०–२० हजार भारतीय रुपैयाँ आम्दानी हुने भन्दै रोजगारीको लोभ देखाइएको थियो। २०८२ जेठमा काठमाडौंको कोटेश्वरबाट कलंकी हुँदै बुटवल, भैरहवा, सुनौली पार गरेर भारतको चण्डीगढ पुर्याइयो। त्यहाँ अपार्टमेन्टमा करिब एक महिना राखेर स्वास्थ्य परीक्षण गराइयो।
एक महिना बितिसकेपछि, प्रतिवादीहरुले पीडितलाई भने, ‘तिम्रो मृगौला निकाल्दा ६ लाख रुपैयाँ दिनेछौं, रकम नेपाल फर्किएपछि बुझाइनेछ।’ पीडितले अस्वीकार गर्दा समेत, “तिम्रो खर्च सबै तिमीले तिर्नु पर्छ” भन्दै डर–त्रास र करकापमा पारेर २०८२ साउन ९ गते नाम नखुलेको क्लिनिकमा बायाँ मृगौला निकालियो।
नेपाल फर्कँदा वचनबमोजिमको रकम दिइएन। अझ पीडितलाई तत्काल थाहा पनि भएन कि उनको मृगौला नै चोरी भइसकेको छ। पछिल्लो समय स्वास्थ्यमा समस्या देखिएपछि मात्र उनले चिकित्सा परीक्षण गराए र घटनाको खुलासा भयो। त्यसपछि मात्र उनले ब्युरोमा जाहेरी दर्ता गरे।
प्रहरीको अनुसन्धानले देखाएको छ कि यो गिरोह नेपाल र भारत दुवै स्थानमा बसेर योजनाबद्ध तरिकाले मृगौला निकासीको सम्पूर्ण प्रक्रिया मिलाउँछ। आर्थिक अवस्था कमजोर भएका व्यक्तिलाई लक्ष्य बनाएर आकर्षक रकमको प्रलोभन दिनु, सीमा पार गराई सुरक्षित आवासमा राख्नु, मेडिकल चेकजाँचदेखि अंग निकासीसम्मका सबै व्यवस्था गर्नु — यी सबै उनीहरुको कार्यशैलीमा पर्दछन्।
ब्युरोका अनुसार, यसअघि पनि विभिन्न जिल्लाका दर्जनौं व्यक्तिका मृगौला अवैध रुपमा बिक्री गरेको प्रमाण भेटिएको छ। चोरी गरिएका मृगौला चर्को मूल्यमा बिक्री हुने र सोबाट गिरोहले ठूलो नाफा कमाउने गरेको पाइएको छ।
पक्राउ परेका तीनै जनाविरुद्ध संगठित अपराध निवारण ऐन, २०७० बमोजिम सात दिनको म्याद थपेर अनुसन्धान भइरहेको छ। यस घटनामा संलग्न अन्य फरार आरोपीहरुको खोजी भइरहेको र थप पीडितहरुको पहिचान प्रक्रिया पनि सुरु भएको प्रहरीले जनाएको छ
