युक्रेनका राष्ट्रपति भोल्दोमिर जेलेन्स्कीले रुसले उत्तर कोरिया, चीन तथा पाकिस्तानलगायत कैयौं देशका सैनिकहरू भाडामा लिएको दाबी गरेका छन्। उनले ती ‘भाडाका सैनिक’हरूसँग आफ्ना ‘बहादुर सैनिक’हरू भिडिरहेको भन्दै प्रशंसा पनि गरेका छन्।
सामाजिक सञ्जालमा युक्रेनी सैनिकहरूसँगका तस्विरहरू सार्वजनिक गर्दै राष्ट्रपति जेलेन्स्कीले त्यसको ‘जवाफ दिने’ चेतावनी पनि दिएका छन्।
सोमबारमात्रै वोवचान्स्कमा चीन, ताजकिस्तान, उज्वेकिस्तान, पाकिस्तान तथा अफ्रिकी देशका भाडाका सैनिकहरूसँग युक्रेनी सैनिक लडेको दाबी पनि उनले गरेका छन्।
‘यसबारे हामीले हाम्रा सैनिक कमाण्डरसँग कुराकानी गरेका छौं र जानकारीहरू हासिल गरेका छौं’ जेलेन्स्कीले भनेका छन् ‘हामीले यसको जवाफ दिनेछौं।’
यसअघि युक्रेनसँग लड्नका लागि उत्तर कोरियाले आफ्ना थप ३० हजार सैनिक रुस पठाउने खबरहरू सार्वजनिक भएका थिए। सन् २०२४ मा पनि उत्तर कोरियाले लगभग ११ हजार सैनिक रुस पठाएको थियो। ती सैनिकहरू रुसको मुख्य मुख्य नाकाहरूमा युक्रेनी सैनिकसँग लडेका थिए।
साढे तीन वर्षदेखि चलिरहेको यो लडाईंमा लगभग ४ हजार भन्दा धेरै उत्तर कोरियाली सैनिक मारिएका समाचारहरू पनि सार्वजनिक भएका छन्।
