पिनास नाकको भित्र दायाँबायाँ रहने खाली ठाउँमा अवरोधका कारण हुने रोग हो । पिनासको समयमै उपचार नभएमा टाउकोको अग्रभाग अत्यधिक दुख्ने, नाकबाट श्वास फेर्न अप्ठ्यारो पर्ने, नाक गन्हाउने हुन्छ । संक्रमणका कारण आन्तरिक रक्तश्राव हुन सक्ने र भित्रीरूपमा संक्रमण भई क्यान्सरजस्तो रोग लाग्ने सम्भावना पनि हुन्छ ।
पिनास आफैंमा ठूलो जटिलता नभई सामान्य कुरामा लापरबाही हुनाले निम्तिने रोग भएकाले यसबाट बच्न यसका कारणहरूमा विशेष ध्यान दिनु जरुरी हुन्छ । पिनासको आधुनिक चिकित्सा पद्धतिबाट अप्रेसन त हुने गर्दछ तर त्यो फेरि दोहोरिन सक्छ । त्यसैले पनि पिनासको उपचार गर्न आयुर्वेद उपचार गर्ने क्रम बढेको छ ।
घरेलु उपचार
– जेठीमधु, अमला (दुई चम्चा दैनिक) सेवन गर्ने ।
– विरेनुन (आधा चम्चा खानासँग) खाने ।
– कुट्की नाकको प्वालमा राख्ने ।
– एक टुक्रा बेसारलाई तेलमा भिजाएर बाल्ने र निस्केको धुवाँमा श्वास लिने ।
– मरीच बाल्ने र कागजको त्रिकोण आकारको एउटा ढुंग्रो बनाएर ढुंग्रोद्वारा मरीचको धुवाँ लिने ।
– लसुनलाई तातो खरानीमा सेकाएर दिनको तीन पटक खाने ।
– आधा गिलास करेला, आधा गिलास कागतीको रस र एक चम्चा मह मिसाउने र दिनको तीन पटक खाने ।
