पोखरा, ८ मङ्सिर । गण्डकी प्रदेशका प्रतिनिधिसभा अन्तर्गत १८ निर्वाचन क्षेत्र र प्रदेश सभा अन्तर्गत ३६ वटा निर्वाचन क्षेत्र मध्ये अधिकांशको नतिजा सार्वजनिक भएको छ ।
स्याङजाको क्षेत्र नं २ मा मतगणना विवादका कारण स्थगित छ भने केहीमा गणना जारी छ । कुल ११ वटा जिल्लामा समेटिएको गण्डकीको तीन निर्वाचन क्षेत्र रहेको कास्की जिल्लामा अधिकांश स्थानमा नेकपा एमाले विजयी बनेको छ ।
प्रतिनिधि सभा सदस्यका लागि कास्कीको निर्वाचन क्षेत्र नं १ मा मनबहादुर गुरुङको अग्रता छ । क्षेत्र नं २ र ३ मा नेकपा एमालेका क्रमशः विद्या भट्टराई र दामोदर बैरागी निर्वाचित बन्नुभएको छ ।
प्रदेशसभातर्फ निर्वाचन क्षेत्र नं १ को (१) मा नेकपा एमालेका खगराज अधिकारीको अग्रता छ भने (२) मा एमालेका बेदबहादुर गुरुङ(श्याम) निर्वाचित बन्नुभयो । निर्वाचन क्षेत्र नं २ को (१) र (२) मा एमालेका भीम कार्की र काँग्रेसका विन्दुकुमार थापा निर्वाचित बन्नुभएको छ । त्यस्तै निर्वाचन क्षेत्र नं ३ को(१) मा काँग्रेसका प्रकाश बरालको अग्रता छ । (२) मा एमालेका गणेशमान गुरुङ विजयी बन्नुभएको छ ।
तनहुँको क्षेत्र नं १ र २ मा प्रतिनिधि सभा सदस्यमा काँग्रेसका रामचन्द्र पौडेल र शंकर भण्डारी विजयी बन्नुभएको छ । क्षेत्र नं १ को प्रदेशसभा (१) र (२) मा क्रमशः काँग्रेसका अशोक श्रेष्ठ र माओवादीका हरिबहादुर चुमान विजयी बन्नुभएको छ भने क्षेत्र नं २ को (१) मा एमालेका श्यामराजा महत र काँग्रेसका जितप्रकाश आले विजयी बन्नुभएको छ ।
बाग्लुङको निर्वाचन क्षेत्र नं १ र २ मा प्रतिनिधिसभा सदस्यमा क्रमशः राष्ट्रिय जनमोर्चाका चित्रबहादुर केसी र माओवादी केन्द्रका देवेन्द्र पौडेल विजयी बन्नुभएको छ । क्षेत्र नं १ को प्रदेशसभा(१) र (२) मा काँग्रेसका दीपेन्द्रबहादुर थापा र डिल्लीराम सुवेदी निर्वाचित बन्नुभएको छ भने क्षेत्र नं २ को प्रदेशसभा(१( र(२) मा काँग्रेसकै जित शेरचन र दोर्ण कुँवर विजयी बन्नुभएको छ ।
गोरखाको निर्वाचन क्षेत्र नं १ र २ मा प्रतिनिधिसभा सदस्यमा क्रमशः काँग्रेसका राजेन्द्र बजगाई र माअोवादीका पुष्पकमल दहाल प्रचण्ड विजयी बन्नुभएको छ । क्षेत्र नं १ को प्रदेशसभा(१) र (२) मा क्रमशः माओवादीका कृष्ण धिताल र काँग्रेसका नन्दप्रसाद न्यौपाने विजयी बन्नुभएको छ भने क्षेत्र नं २ को(१) र (२) मा क्रमशः नेपाल समाजवादीका फडिन्द्र देवकोटा र काँग्रेसका सुरेन्द्रराज पाण्डे विजयी बन्नुभएको छ ।
नवलपुरको निर्वाचन क्षेत्र नं १ र २ मा प्रतिनिधिसभामा काँग्रेसका क्रमशः डा.शशांक कोइराला र विष्णु कार्कीको अग्रता छ । क्षेत्र नं १ को प्रदेशसभा(१) र (२) मा क्रमशः काँग्रेसका महेन्द्रध्वज जिसी र एमालेका रोशनबहादुर गाहा विजयी बन्नुभएको छ भने क्षेत्र नं २ को(१) र (२) मा क्रमशः एमालेका पद्मा जिसी र लक्ष्मणबहादुर पाण्डे विजयी बन्नुभएको छ ।
लम्जुङमा प्रतिनिधिसभा सदस्यमा एमालेका पृथ्वीसुव्वा गुरुङ, प्रदेशसभा(१) मा काँग्रेसका टकराज गुरुङ र (२) मा भेषबहादुर पौडेल विजयी बन्नुभएको छ ।पर्वतको प्रतिनिधिसभा सदस्यमा पदम गिरी, प्रदेशसभा(१) र (२) मा एमालेका भक्त कुँवर र मित्रलाल बस्याल विजयी बन्नुभएको छ ।
हिमाल पारीको जिल्ला मुस्ताङमा प्रतिनिधि सभा सदस्यमा काँग्रेसका योगेश गौचन, प्रदेश सभा(१)मा काँग्रेसका नम्डु गुरुङ (२) मा विकल शेरचन विजयी बन्न्ुभएको छ ।मनाङमा प्रतिनिधिसभा सदस्यमा काँग्रेसका टेकबहादुर गुरुङ, प्रदेशसभा (१) मा काँग्रेसका मुनिन्द्रजंग गुरुङ र (२) मा यस अघि नै राजीव गुरुङ(दीपक मनाङे) निर्विरोध निर्वाचित भैसक्नुभएको छ ।
म्याग्दीमा प्रतिनिधिसभा सदस्यमा काँग्रेसका खम्बिर गर्बुजा, प्रदेश सभा(१) मा माओवादीका हरि भण्डारी र (२) मा रेशमबहादुर जुग्जाली निर्वाचित बन्नुभएको छ । स्याङ्जाको निर्वाचन क्षेत्र नं १ मा काँग्रेसका राजु थापाको अग्रता छ। प्रदेशसभा(१) मा एमालेकी सीता सुन्दास विजयी बन्नुभयो भने (२) मा काँग्रेसका बुद्धिबहादुर राना(कुमार)को अग्रता छ । स्याङ्जाको निर्वाचन क्षेत्र नं २ मा विवादका कारण मतगणना स्थगित छ ।
