पोखरा, १५ कात्तिक । नेपाली काँग्रेसका प्रवक्ता एवं चुनाव प्रचारप्रसार समितिका संयोजक डा.प्रकाशशरण महतले पाँच दलीय गठबन्धन राजनीतिक आवश्यकता भएको बताउनुभएको छ ।
खेलकुद क्षेत्र समन्वय प्रचारप्रसार उप–समिति गण्डकी प्रदेशले मंगलबार पोखरामा आयोजना गरेको छलफल कार्यक्रममा बोल्दै डा. महतले काँग्रेस एक्लै चुनाव लडेर भन्दा गठबन्धनबाट लड्दा धेरै सिट जित्न सकिने भएकै कारण निर्वाचनमा पाँच दलीय गठबन्धनलाई रोजेर अगाडि बढेको हो ।
काँग्रेस ठूलो पार्टी हो, अन्य दलका भन्दा धेरै मतदाता र नेता छन् तर प्रत्यक्ष निर्वाचनमा थोरै मतले हारजित हुने गर्छ, एक सय ६५ निर्वाचन क्षेत्रमा उम्मेदवार दिएर थोरै सिट जित्नुभन्दा ९१ ठाँउमा उम्मेदवार दिएर धेरै सिट जित्ने सिद्धान्त अनुसार नै काग्रेस अगाडि वढेको हो, नेता महतले भन्नुभयो– सीमित नेताले मात्र टिकट पाएका छन्, चित्त सानो नगरी काँग्रेस तथा पाँच दलीय गठबन्धन अन्तरगत निर्वाचनमा उम्मेदवार बनेका अन्य पार्टीका उम्मेदवारलाई जिताउन हरेक काँग्रेस कार्यकर्ता सक्रिय भएर लागौँ । निर्वाचन जितेपछि सरकारको नेतृत्व काँग्रेसले नै गर्छ नेता महतले भन्नुभयो ।
निर्वाचनमा एक भोटले पनि ठूलो महत्व राख्छ, काम गर्ने पार्टी काँग्रेस हो, तर जनतामाझ प्रचारप्रसार गर्न नसक्दा पछि परेका छौ, महतले भन्नुभयो–संबिधानको रक्षा र राजनीतिक स्थायित्वका लागि पाँच दलीय गठबन्धन अगाडि वढेको हो । प्राप्त उपलब्धिको रक्षा गर्दै यही संबिधानलाई टेकेर समयको माग अनुसार संविधान संशोधन गर्ने काँग्रेसको बाटो रहेको जानकारी डा. महतले दिनुभयो ।
नेपाली काँग्रेसकी केन्द्रीय सदस्य डीला संग्रौलाले काँग्रेसले मात्र लोकतन्त्रको रक्षा गर्न सक्ने बताउदै पार्टीमा युवा वर्ग र महिलालाई समेटेर अगाडि वढ्नुपर्ने बताउनुभयो । नेपाली काँग्रेस पार्टीले आफूले गरेका कामलाई प्रचारप्रसार गर्न नसक्दा पछि परेको उहाँले बताउनुभयो । संचारको जमानामा हामीले आफ्ना काम प्रचारमा ल्याउन नसक्नु बिडम्बना हो, नेता संग्रौलालले भन्नुभयो ।
नेपाली काँग्रेसका केन्द्रीय सदस्य उमेशजंग रायमाझीले प्रसस्त मात्रामा सम्भावना भएको देश नेपालमा शिक्षा, स्वास्थ्य र रोजगारीको ग्यारेण्टी गर्न सक्यौ भने देश सम्मृद्धितर्फ अगाडि वढ्न समय नलाग्ने बताउनुभयो । राजनीति बेथितिले हामीलाई कमजोर बनाएको छ, राजनीतिक व्यवस्थापन मिलाउन सक्यौँभने समाज छिट्टै रुपान्तरण हुन्छ । अहिले पनि दुर दराजका मानिसको जीवन स्तरमा परिवर्तन ल्याउन सकेका छैनौ, काँग्रेसले अब तिनै गरिब जनताको जीवनस्तर उठाउन काफ्ना योजना अघि सार्ने छ, नेता रायमाझीले भन्नुभयो ।
नेपाली काँग्रेस गण्डकी प्रदेशका सभापति शुक्रराज शर्माले ५ दलीय गठबन्धनको साझा लक्ष्य सम्मृद्ध नेपाल निर्माणका लागि रहेको बताउनुभयो । सो अवसरमा शुभराम बस्नेत, कर्मछिरिङ शेर्पा, बसन्त थकाली, रत्न श्रेष्ठ लगायतले आफ्ना भनाई राखेका थिए ।
