पोखरा, १४ कात्तिक ः नेपाली काँग्रेस गण्डकी प्रदेशका सभापति शुक्रराज शर्माले पाँच दलीय गठबन्धनको साझा लक्ष्य सम्मृद्ध नेपाल निर्माणका लागि रहेको बताउनुभएको छ । पाँच दलीय गठबन्धन निर्वाचन परिचालन समिति कास्की निर्वाचन क्षेत्र नं १ (२) द्धारा सोमबार आयोजित उम्मेदवार परिचय कार्यक्रमलाई सम्बोधन गर्दै नेता शर्माले लोकतान्त्रिक संविधानको रक्षा गर्दै सम्मृद्ध नेपाल निर्माण गर्ने साझ लक्ष्यका साथ पाँच दलीय गठबन्धन अगाडि वढेको बताउनुभयो ।
नेपाली जनताले रगत बगाएर ल्याएको संविधानको रक्षा गर्नका लागि पाँच दल अगाडि वढेको बताउँदै नेता शर्माले यस पटक कास्कीका नौ वटै सिट गठबन्धनका उम्मेदवारहरुले जित्ने दावी गर्नुभयो । विश्व नै सागुरो भएको अवस्थामा नेपाली युवाहरु राजनीतिक रुपमा पनि निकै अगाडि छन् उनीहरुलाई निर्वाचनमा कुन उम्मेदवारलाई मत दिनुपर्छ भनेर भन्नु पर्ने अवस्था छैन, उनीहरु नै विवेक प्रयोग गरी लोकतन्त्रको रक्षा गर्न जान्दछन् नेता शर्मले भन्नुभयो । सोही अवसरमा बोल्दै नेपाली काँग्रेसका नेता तथा पूर्व मन्त्री यज्ञबहादुर थापाले पाँचै दलका नेता तथा कार्यकर्ता अब २४ सै घण्टा चुनावी प्रचारमा जुट्नु पर्ने बताउनुभयो । कास्कीका सबै सिट गठबन्धनको पक्षमा ल्याउन यो वा त्यो न भनी सबै एक जुटभएर प्रचारमा जुट्नु पर्ने थापाको जोड थियो ।
नेकपा (एकीकृत) समाजवादीका नेता दिलु पन्तले गठबन्धनबाट उम्मेदवार बनेका सबै आफ्नै उम्मेदवार हुन भनि सबै नेता तथा कार्यकर्ता प्रचारमा जुट्नुपर्नेमा जोड दिनुभयो । पाँच दलीय गठबन्धनको तर्फबाट कास्की निर्वाचन क्षेत्र नं १ प्रतिनिधि सभा सदस्यका उम्मेदवार किशोरदत्त बरालले उम्मेदवार सबै मतदाताको घरमा भोट माग्न जाने सम्भावना नरहेका कारण दुःख नमानीक मदतान गरिदिनुहुन आग्रह गर्नुभयो । लोकतन्त्रको रक्षा र सम्मृद्ध नेपाल निर्माणका लागि आफ्नो उम्मेदवारी रहेको जानकारी बरालले दिनुभयो । कास्की निर्वाचन क्षेत्र नं १ (२) बाट प्रदेश सभा सदस्यका उम्मेदवार दीपक गुरुङले लोकतन्त्रको रक्षाका लागि पाँच दलीय गठबन्धन बनेको बताउनुभयो । सोही अवसरमा पाँच दलीय गठबन्धन कास्की निर्वाचन क्षेत्र नं १ को सितलादेवी स्थापना गरिएको चुनावी सम्पर्क कार्यालयको शुभारम्भ समेत गरिएको थियो ।
