पोखरा, २४ मंसिर । पोखरामा शनिवार (आज) देखि सातौँ अन्तर्राष्ट्रिय पर्वतीय महोत्सव सुरु भएको छ । उपराष्ट्रपति नन्दकिशोर पुन र नेपाल पर्वतारोहण संघका अध्यक्ष निमा नुर शेर्पाको उपस्थितिमा महोत्सवको उद्घाटन गरिएको हो । नेपाल पर्वतारोहण संघले डिसेम्बर ११ मा पर्ने अन्तर्राष्ट्रिय पर्वतीय दिवसको अवसरमा महोत्सव आयोजना गरिएको हो ।
महोत्सवअन्तर्गत सगरमाथा आधार शिविर व्यवस्थापन, प्रविधि तथा अन्वेषणको प्रवर्द्धन तथा प्रदर्शन, पोखरामा पर्यटकको संख्या कसरी वृद्धि गर्न सकिन्छलगायत विषयमा छलफल तथा अन्तक्रिया कार्यक्रमको आयोजना गरिने छन् । महोत्सवको पहिलो दिन सगरमाथा आधार शिविर व्यवस्थापन, प्रविधि तथा अन्वेषणको प्रवर्द्धन तथा प्रदर्शनको विषयमा छलफल हुनेछ ।
पर्वतीय संग्रहालयकी निर्देशक निर्मला न्यौपानेका अनुसार पर्वतीय क्षेत्रमा उत्पादित हुने वस्तु र खेलिने खेललाई प्राथमिकतामा राख्दै कार्यक्रम तय गरिएको छ । हिमाली क्षेत्रमा खेलिने खेल छेलो प्रतियोगिता र आर्चरी खेललाई महोत्सवमा समेटिएको छ । हिमाली क्षेत्रमा उत्पादित वस्तुलाई प्रवर्द्धन गर्न स्टल प्रदर्शनीका लागि राखिएको निर्देशक न्यौपानेले बताइन् । महोत्सव अवधिभर हिमाली क्षेत्रमा उत्पादित वस्तुको प्रवर्द्धनका कार्यक्रम, छेलो प्रतियोगितामा पनि गरिने छ ।
